وفاقی وزیر داخلہ محسن نقوی نے ایوان وزیراعلیٰ پشاور کا دورہ کیا، جہاں ان کی وزیراعلیٰ خیبرپختونخوا علی امین گنڈا پور سے ملاقات ہوئی۔ اس ملاقات میں خیبرپختونخوا میں امن و امان کی صورتحال اور کرم میں قیام امن کے لیے کیے جانے والے اقدامات پر تفصیلی تبادلہ خیال کیا گیا۔

محسن نقوی نے وزیراعلیٰ علی امین گنڈا پور کو امن قائم کرنے کے لیے ہر ممکن تعاون کی یقین دہانی کراتے ہوئے کہا کہ خیبرپختونخوا میں قانون نافذ کرنے والے اداروں کی استعداد کار بڑھانے میں وفاق مکمل حمایت کرے گا۔ انہوں نے کہا کہ کرم میں پائیدار امن کے قیام کو اولین ترجیح دی جائے گی۔

شہداء کو خراج عقیدت
دونوں رہنماؤں نے دہشت گردی کے خلاف جنگ میں قانون نافذ کرنے والے اداروں کے شہداء کو خراج عقیدت پیش کیا۔ محسن نقوی اور علی امین گنڈا پور کا کہنا تھا کہ شہداء کی قربانیاں ہمارے لیے قابلِ فخر ہیں اور انہیں کبھی فراموش نہیں کیا جائے گا۔

وزیراعلیٰ خیبرپختونخوا نے کہا کہ تمام شراکت داروں کی مشاورت سے کرم میں مستقل امن کے لیے اقدامات کیے جائیں گے۔ انہوں نے مزید کہا کہ دہشت گردی کے عفریت کا مل کر مقابلہ کیا جائے گا۔

ایپکس کمیٹی کا اجلاس
وزیراعلیٰ علی امین گنڈا پور کی زیر صدارت آج صوبے میں امن و امان کی صورتحال پر ایپکس کمیٹی کا اجلاس منعقد ہو گا۔ خیبرپختونخوا کے مشیر اطلاعات بیرسٹر سیف نے کہا کہ اجلاس میں اعلیٰ سول اور عسکری قیادت شرکت کرے گی۔ اجلاس میں کرم کے مسئلے پر اہم فیصلوں کی توقع کی جا رہی ہے، جبکہ بنکرز اور اسلحے کے خاتمے کے حوالے سے بھی پیشرفت کا امکان ہے۔

ایپکس کمیٹی کو اب تک کیے گئے امن و امان کے اقدامات سے آگاہ کیا جائے گا اور کرم میں پائیدار امن کے لیے حکمت عملی وضع کی جائے گی۔