بانی پی ٹی آئی عمران خان کی ہمشیرہ علیمہ خان نے انکشاف کیا ہے کہ عمران خان نے حکومت سے اپنے دو اہم مطالبات پیش کیے ہیں۔ ان کا کہنا ہے کہ اگر ان مطالبات کو تسلیم نہیں کیا گیا تو وہ سمندر پار پاکستانیوں سے ترسیلات زر وطن بھیجنے کی اپیل روکنے کا اعلان کریں گے

اڈیالہ جیل کے باہر میڈیا سے گفتگو کرتے ہوئے علیمہ خان نے کہا کہ عمران خان کے یہ دو مطالبات ہیں:

سپریم کورٹ کے تین سینئر ججوں پر مشتمل جوڈیشل کمیشن کا قیام۔

بے گناہ کارکنوں کی فوری رہائی۔

انہوں نے بتایا کہ بانی پی ٹی آئی نے اپنے مطالبات کے ساتھ پارٹی رہنماؤں کو حکومت سے بات چیت کے لیے بھیجا ہے۔ ان کے مطابق سمندر پار پاکستانی مسلسل عمران خان کو کالز کر رہے ہیں اور کہہ رہے ہیں کہ وہ اپنی ترسیلات زر روکنے کو تیار ہیں، لیکن پارٹی کے کچھ رہنماؤں نے عمران خان کو مشورہ دیا ہے کہ یہ اقدام ملک کے لیے نقصان دہ ہوگا، اس لیے فی الحال انتظار کریں۔

علیمہ خان نے مزید کہا کہ عمران خان اس بات پر زور دے رہے ہیں کہ غریب محنت کش مزدور اپنی محنت کی کمائی ملک بھیجتے ہیں، جبکہ اشرافیہ ان ڈالروں کا غلط استعمال کرتی ہے۔ انہوں نے کہا کہ عمران خان بہت تکلیف میں ہیں اور ان کا کہنا ہے کہ یہ سلسلہ اب مزید نہیں رکے گا۔

انہوں نے ماضی کے واقعات پر روشنی ڈالتے ہوئے کہا کہ 24 نومبر کے پرامن احتجاج پر گولیاں چلائی گئیں، بے گناہ لوگوں کو شہید اور زخمی کیا گیا، جبکہ رات کے اندھیرے میں قتلِ عام کیا گیا۔ علیمہ خان کا کہنا تھا کہ ہم اس ظلم کے عینی شاہد ہیں۔

عمران خان نے دعویٰ کیا کہ حکومت نے 10 عمارتیں جلانے اور 10 ہزار افراد کو گرفتار کرنے کا جھوٹا بیانیہ بنایا۔ ان کا کہنا تھا کہ 8 فروری کو عوام نے واضح پیغام دیا کہ وہ ظلم کے نظام کے خلاف ہیں، لیکن 9 فروری کو لوگوں کے ووٹ چوری کرکے ایک جعلی حکومت مسلط کردی گئی۔

علیمہ خان نے کہا کہ عمران خان نے حکومت کو دو ٹوک پیغام دیا ہے کہ ان کے مطالبات فوری طور پر پورے کیے جائیں، ورنہ وہ عوامی طاقت سے حکومت کے خلاف سخت اقدام اٹھائیں گے۔