چینی سرمایہ کاروں نے کراچی میں 1 ارب ڈالر کی سرمایہ کاری کے ساتھ ایک عظیم الشان میگا میڈیکل سٹی کے قیام کا اعلان کیا ہے۔ اس منصوبے کا مقصد پاکستان کے میڈیکل کے نظام کو بین الاقوامی معیار کے مطابق اپ گریڈ کرنا اور کراچی میں صحت کی سہولیات کو بہتر بنانا ہے۔

یہ اعلان ایف پی سی سی آئی کے ہیڈ آفس میں ایک اعلیٰ سطحی اجلاس کے دوران کیا گیا، جس کی میزبانی ایف پی سی سی آئی نے کی۔ اجلاس میں چینی وفد کے ساتھ پاکستان چائنا بزنس کونسل اور ایف پی سی سی آئی کی مرکزی قائمہ کمیٹی برائے خارجہ امور، تجارت اور سرمایہ کاری کے اراکین شریک ہوئے۔

ایف پی سی سی آئی کے صدر عاطف اکرام شیخ نے کہا کہ یہ منصوبہ کراچی کے لیے ایک سماجی و اقتصادی تبدیلی کا پیش خیمہ ثابت ہوگا۔ انہوں نے مزید کہا کہ منصوبے کے تحت عالمی معیار کا میڈیکل کالج، میڈیکل آلات کی تیاری، اور صحت کی دیکھ بھال کے دیگر ادارے قائم کیے جائیں گے۔

چائنا پاکستان ریسرچ اینڈ انوویشن انٹرپرائزز الائنس کے صدر Meng Xiao Wei نے بتایا کہ یہ منصوبہ تین سال میں مکمل ہوگا اور اس سے 50,000 سے زائد ملازمتیں پیدا ہوں گی۔ منصوبے کو پاکستان چائنا میڈیکل ایسوسی ایشن کا تعاون بھی حاصل ہوگا۔

ایف پی سی سی آئی کی پاکستان چائنا بزنس کونسل کے چیئرمین شبیر منشاء نے کہا کہ چینی وفد نے دیگر شعبوں میں بھی سرمایہ کاری کا ارادہ ظاہر کیا ہے، جن میں کولڈ ایکسٹریکشن مائن پروجیکٹ، کھاد کی تیاری، سولر انرجی، اور کراچی سے سکھر تک تیز رفتار ٹرین ٹریک شامل ہیں۔

اس منصوبے کو پاکستان اور چین کے مضبوط معاشی تعلقات کی ایک اور مثال قرار دیا جا رہا ہے، جو پاکستان میں ترقی اور خوشحالی کی راہیں ہموار کرے گا۔