سپریم کورٹ کے آئینی بینچ نے فوجی عدالتوں کو 85 ملزمان کے فیصلے سنانے کی اجازت دے دی۔ جسٹس امین الدین کی سربراہی میں بینچ نے انٹرا کورٹ اپیلوں کی سماعت کی، جہاں وزارت دفاع کے وکیل خواجہ حارث نے دلائل دیے۔ عدالت نے اپنے حکم نامے میں واضح کیا کہ فوجی عدالتوں کے فیصلے سپریم کورٹ کے زیر التواء مقدمے کے حتمی فیصلے سے مشروط ہوں گے۔

حکم کے مطابق جن ملزمان کو سزا میں رعایت دی جا سکتی ہے، انہیں دے کر رہا کیا جائے گا، جبکہ دیگر ملزمان کو سزا سنانے کے بعد جیلوں میں منتقل کیا جائے گا۔

سماعت کے دوران جسٹس جمال مندوخیل نے وکیل خواجہ حارث کو مخاطب کرتے ہوئے کہا کہ عدالتی فیصلے کو خراب قرار نہ دیں۔ خواجہ حارث نے معذرت کرتے ہوئے کہا کہ ان کے الفاظ قانونی نوعیت کے نہیں تھے۔

جسٹس محمد علی مظہر نے سوال کیا کہ کیا آرمی ایکٹ میں ترمیم کر کے ہر شخص کو اس کے دائرے میں شامل کیا جا سکتا ہے؟ جسٹس مندوخیل نے نشاندہی کی کہ آرمی ایکٹ 1973 کے آئین سے پہلے کا بنایا گیا قانون ہے، جس کی دفعات کو آئین کے مطابق پرکھنا ضروری ہے۔

عدالت نے وزارت دفاع سے 9 مئی کے واقعات کی تفصیلات فراہم کرنے کا حکم بھی دیا۔ ایڈیشنل اٹارنی جنرل نے آگاہ کیا کہ تمام تفصیلات آج صبح موصول ہوئی ہیں اور انہیں باضابطہ طور پر متفرق درخواست کی صورت میں جمع کروایا جائے گا۔

عدالت نے سماعت ملتوی کرتے ہوئے تمام تفصیلات آئندہ سماعت پر پیش کرنے کا حکم دیا۔