اسلام آباد: ایشیائی ترقیاتی بینک (اے ڈی بی) نے پاکستان میں بجلی کی ترسیل کے نظام کو جدید بنانے اور بجلی کی فراہمی میں بہتری کے لیے 20 کروڑ ڈالر قرض کی منظوری دے دی۔ اس کے ساتھ ہی 33 کروڑ ڈالر کی اضافی فنانسنگ کی منظوری بھی دی گئی ہے۔

اے ڈی بی کے جاری کردہ اعلامیہ کے مطابق “پاور ڈسٹری بیوشن اسٹرینتھننگ پروجیکٹ” کے تحت ملک میں بجلی کی بڑھتی ہوئی طلب کو پورا کرنے کے لیے ترسیلی نظام کو اَپ گریڈ کیا جائے گا۔ اس منصوبے کا مقصد ترسیل کے دوران ہونے والے توانائی کے نقصانات میں کمی لانا اور انفرااسٹرکچر کو موسمیاتی تبدیلیوں اور قدرتی آفات سے محفوظ بنانا ہے۔

یہ منصوبہ ابتدائی طور پر لاہور الیکٹرک سپلائی کمپنی (لیسکو)، ملتان الیکٹرک پاور کمپنی (میپکو) اور سکھر الیکٹرک پاور کمپنی (سیپکو) کو سہولت فراہم کرے گا، جس سے ان علاقوں میں توانائی کی ترسیل زیادہ مؤثر اور پائیدار ہو سکے گی۔

اس منصوبے کے تحت کم از کم تین لاکھ 32 ہزار ایڈوانسڈ میٹرنگ انفرااسٹرکچر اور 15 ہزار 800 آن لائن ٹرانسفارمر مانیٹرنگ سسٹمز نصب کیے جائیں گے۔ سکھر الیکٹرک پاور کمپنی کے چار گرڈ اسٹیشنز کی وولٹیج کو 66 کلو واٹ سے 132 کلو وولٹ تک اَپ گریڈ کیا جائے گا تاکہ ترسیلی نظام میں نقصانات کو کم کیا جا سکے۔

اس کے علاوہ، اے ڈی بی نے پاکستان کے سماجی تحفظ کے پروگرامز کو مزید مستحکم کرنے کے لیے 33 کروڑ ڈالر کی اضافی مالی معاونت کی بھی منظوری دی ہے۔ یہ فنڈز غربت میں کمی لانے کے لیے خواتین اور ان کے خاندانوں کی مدد کریں گے، خاص طور پر قدرتی آفات سے متاثرہ علاقوں میں رہنے والے مستحقین کے لیے صحت اور غذائی خدمات فراہم کرنے پر توجہ دی جائے گی۔

ایشیا ترقیاتی بینک کا کہنا ہے کہ یہ اقدامات پاکستان کے کمزور طبقات کی مدد کرنے اور ملک کی سماجی ترقی میں اہم کردار ادا کریں گے۔