لندن منی ایکسچینج بیورو کے سابق سربراہ احسن جاوید نے سکاٹ لینڈ یارڈ پر مقدمہ دائر کیا ہے جس میں کہا گیا ہے کہ پولیس کی جانب سے ضبط کیے گئے 6 لاکھ پاؤنڈ ز کی رقم واپس لی جائے کیونکہ کراؤن پراسیکیوشن سروس ان کے خلاف 34 ملین پاؤنڈ ز کی منی لانڈرنگ کیس ثابت کرنے میں ناکام رہی ہے۔
لندن پولیس کے خلاف احسن جاوید کے کیس کے مرکز میں ان کے چار لیپ ٹاپ ہیں جو اسکاٹ لینڈ یارڈ کے افسران نے نومبر 2017 میں چھاپوں کے دوران ضبط کیے تھے اور تقریبا چار سال بعد واپس آئے تھے۔ احسن جاوید نے الزام عائد کیا کہ ان کے لیپ ٹاپ میں ہیرا پھیری کی گئی، ان کے ساتھ چھیڑ چھاڑ کی گئی، پاس ورڈ تبدیل کیے گئے اور ضبط کی گئی نقد رقم کی اصل ملکیت ثابت کرنے کے لیے اہم شواہد کو تباہ کر دیا گیا۔احسن جاوید اور ان کی اہلیہ آمنہ گلزار اور دو دیگر افراد کو پہلی بار نومبر 2017 میں گرفتار کیا گیا تھا لیکن مئی 2018 میں ان پر جعلی کمپنیاں اور اکاؤنٹس قائم کرکے جعلی شناخت کے ذریعے 34 ملین پاؤنڈ کی منی لانڈرنگ کی سازش کرنے کا الزام عائد کیا گیا تھا۔ ان پر برطانیہ سے پاکستان اور دیگر ممالک میں رقم منتقل کرنے سے قبل 43 بینک اکاؤنٹس میں نقد رقم چھپانے کا الزام تھا لیکن پولیس اور استغاثہ کی ناکامیوں کے باعث مقدمے کی سماعت ناکام ہوگئی۔ تاہم، اکتوبر 2021 میں جاوید کی بریت کے وقت پولیس نے ان کی ضبط کی گئی نقد رقم واپس نہیں کی – جس کا تخمینہ 600،000 پاؤنڈ لگایا گیا تھا۔ احسن امتیازی سلوک، ناانصافی اور غلط کاموں پر پولیس کو عدالت میں لے گئے ہیں۔

یہ مقدمہ اکتوبر 2021 میں اسنارس بروک کراؤن کورٹ میں استغاثہ کی جانب سے ‘منظم اور تباہ کن’ انکشافات کی ناکامیوں، ناقص تیاری اور شواہد کی کمی کی وجہ سے ختم ہو گیا تھا۔ جج چارلس فاک نے مقدمے کی سماعت روک دی اور سی پی ایس کی مذمت کی جب استغاثہ کے ادارے نے تحقیقات اور ثبوت تیار کرنے کے لیے مزید وقت مانگا۔
جج نے کہا تباہ کن ناکامی اس لیے ہوئی ہے کیونکہ تحقیقات کا حجم تیزی سے بڑھ رہا ہے اور اس کے لیے مناسب افرادی قوت، وسائل، تربیت یا مہارت مختص نہیں کی گئی ہے۔
احسن جاوید اور ان کے اہل خانہ نے مقدمے کی سماعت کے خاتمے اور استغاثہ کی جانب سے مجرمانہ سزا دلوانے میں ناکامی پر خوشی کا اظہار کیا لیکن جاوید کی الجھن یہیں ختم نہیں ہوئی کیونکہ پولیس نے اعلان کیا کہ ان کی رقم منجمد رہے گی اور کرائم ایکٹ (پی او سی اے) کے تحت قابل وصول رقم کے طور پر ضبط کی جائے گی جو پولیس کو باضابطہ الزامات کے بغیر رقم ضبط کرنے کا اختیار دیتا ہے۔ شک کی بنیاد پر کہ ضبط کی گئی رقم قابل وصول جائیداد ہے یا غیر قانونی طرز عمل میں استعمال کرنے کا ارادہ رکھتی ہے۔احسن جاوید نے ایک انٹرویو میں کہا کہ وہ اور ان کے اہل خانہ کئی سالوں سے ایک خوفناک ڈراؤنے خواب سے گزر رہے تھے۔ انہوں نے کہا کہ انہیں اس میں کوئی شک نہیں کہ پاکستانی نژاد ہونے کی وجہ سے ان کے ساتھ ایسا سلوک کیا گیا اور اسی صورتحال میں کسی اور کے ساتھ برطانوی پولیس اور استغاثہ سے مختلف سلوک کیا جائے گا۔

ان کا کہنا تھا ہم نے جو رقم پاکستان بھیجی وہ ترسیلات زر کی منتقلی تھی۔ کسی بھی قسم کی منی لانڈرنگ یا جرم نہیں تھا۔ ہم نے برطانیہ سے غریب اور محنت کش طبقے کے لوگوں سے پیسے پاکستان بھیجے۔ ہماری کمپنیاں فنانشل کنڈکٹ اتھارٹی کے ساتھ رجسٹرڈ تھیں۔ پولیس نے مئی ۲۰۱۸ میں ہم پر منی لانڈرنگ کا الزام لگایا تھا۔ ہم نے پہلے دن سے کہا تھا کہ ہم کسی قسم کی منی لانڈرنگ میں ملوث نہیں ہیں، لیکن کسی نے بھی ہم پر یقین نہیں کیا لیکن تقریبا چار سال بعد ہم صحیح اور بے گناہ ثابت ہوئے کیونکہ استغاثہ ہمارے خلاف کچھ بھی ثابت کرنے میں ناکام رہا۔ استغاثہ کا کہنا تھا کہ وہ شواہد کے ساتھ مکمل طور پر تیار ہیں اور ہم پر جرم قبول کرنے کے لیے دباؤ ڈالنے کی کوشش کی، لیکن ہم نے انکار کر دیا کیونکہ ہم قصوروار نہیں تھے۔ استغاثہ کی درخواست پر ٹرائل شروع ہوا اور پھر استغاثہ نے عدالت کو بتایا کہ وہ تیار نہیں ہے۔ عدالت میں یہ ثابت ہوا کہ یہ رقم بینکنگ ذرائع سے پاکستان بھیجی گئی اور ہر چیز کو دستاویزی شکل دی گئی اور اعلان کیا گیا۔