واشنگٹن:
وفاقی وزیر خزانہ و ریونیو محمد اورنگزیب نے امریکی محکمہ خارجہ کے ایک اعلیٰ عہدیدار سے ملاقات میں پاکستان اور امریکا کے درمیان تجارتی عدم توازن کو دور کرنے کے لیے تعمیری انداز میں روابط بڑھانے کی خواہش کا اظہار کیا۔

وزارت خزانہ کے مطابق، وزیر خزانہ محمد اورنگزیب نے امریکی محکمہ خارجہ میں انڈر سیکریٹری برائے اکنامک گروتھ، انرجی اور انوائرمنٹ کے دفتر میں سینئر عہدیدار تھامس لرستن سے ملاقات کی۔
ملاقات میں وزیر خزانہ نے پاکستان میں منعقدہ معدنیات کانفرنس میں امریکا کی بھرپور اور اعلیٰ سطح پر شرکت پر شکریہ ادا کیا۔

محمد اورنگزیب نے گفتگو کے دوران کہا کہ پاکستان اور امریکا کے درمیان تجارتی توازن بہتر بنانے کے لیے تعمیری انداز میں روابط بڑھانے کی ضرورت ہے۔ انہوں نے بتایا کہ جلد ہی ایک اعلیٰ سطح کا تجارتی اور سرمایہ کاری وفد امریکا کا دورہ کرے گا، جس کا مقصد باہمی فائدے کی بنیاد پر معاشی تعلقات کو مزید فروغ دینا اور نئے مواقع تلاش کرنا ہوگا۔

اہلِ غزہ سے اظہارِ یکجہتی کے لیے آج پاکستان بھر میں شٹر ڈاؤن ہڑتال کی گئی، جس کے نتیجے میں کاروباری سرگرمیاں مکمل طور پر معطل رہیں۔
فلسطینی عوام پر ہونے والے اسرائیلی مظالم کے خلاف پاکستان کے طول و عرض میں ایک بھرپور پیغام دیا گیا۔ کراچی سے لے کر پشاور تک تجارتی مراکز بند، سڑکوں پر ٹریفک معمول سے انتہائی کم اور کاروبار زندگی معطل نظر آیا۔

جماعت اسلامی اور مختلف تاجر تنظیموں کی اپیل پر ملک بھر میں بازار، مارکیٹیں اور شاپنگ مالز بند رہے۔ کراچی میں مرکزی اور ذیلی تمام مارکیٹیں مکمل طور پر بند تھیں، جبکہ متعدد مقامات پر فلسطینی عوام سے یکجہتی کے لیے احتجاجی مظاہرے بھی کیے گئے، جن میں مظاہرین نے اسرائیل مخالف اور فلسطینی عوام کی حمایت میں نعرے لگائے۔

ٹریفک پولیس نے ریلیوں اور احتجاجی اجتماعات کے باعث شہریوں کے لیے متبادل راستوں کا انتظام کیا۔
پشاور میں قصہ خوانی بازار، چوک یادگار اور اشرف روڈ سمیت تاریخی بازار مکمل بند رہے، جبکہ تمام بڑی مارکیٹیں اور مالز بھی فلسطینی عوام سے اظہار یکجہتی کے طور پر بند رہے۔

مری کے پہاڑی علاقوں میں بھی مکمل شٹر ڈاؤن ہڑتال دیکھنے میں آئی۔ مال روڈ، کینٹ مارکیٹ اور دیگر علاقوں میں مکمل سناٹا چھایا رہا۔ راولپنڈی کے راجا بازار، مری روڈ اور صدر کے علاقے بھی ہڑتال کے باعث سنسان رہے۔

اس جدوجہد میں طبی شعبہ بھی شامل رہا۔ ڈرگسٹ اینڈ کیمسٹ ایسوسی ایشن کی جانب سے ہڑتال میں شمولیت اختیار کی گئی، جس کے نتیجے میں کئی میڈیکل اسٹورز احتجاجاً بند رہے۔

بلوچستان کے شہروں کوئٹہ، مستونگ، خضدار، قلات اور پشین میں بھی مکمل شٹر ڈاؤن ہڑتال کی گئی، جبکہ پنجاب کے چھوٹے اور بڑے شہروں میں بھی فلسطینیوں سے یکجہتی کے لیے عوام نے کاروبار بند رکھ کر دنیا کو اپنی وابستگی کا پیغام دیا۔

جماعت اسلامی کے امیر، حافظ نعیم الرحمان نے کہا کہ پاکستانی عوام اسرائیلی ظلم اور امریکی حمایت کو کبھی قبول نہیں کریں گے۔ انہوں نے کہا کہ یہ ہڑتال فلسطینیوں سے محبت اور مظلوموں کے لیے آواز بلند کرنے کی ایک کوشش ہے۔