وزیر دفاع خواجہ آصف نے کہا ہے کہ 10 مئی کی رات پاکستان کی تاریخ کا ایک فیصلہ کن موڑ ثابت ہوئی جب بھارتی جارحیت کا پاک فوج نے بہادری سے جواب دیا اور دشمن کے بڑے بڑے جنگی جہازوں کو پتنگوں کی طرح کاٹ کر رکھ دیا۔ سیالکوٹ میں اپنی رہائش گاہ پر میڈیا سے گفتگو کرتے ہوئے خواجہ آصف نے تینوں افواج کے سربراہان، جوانوں اور وزیراعظم شہباز شریف کو خراج تحسین پیش کیا۔ ان کا کہنا تھا کہ بھارت کی شکست کے بعد نریندر مودی زخم چاٹ رہا ہے، جبکہ پاکستان میں قومی وحدت پہلے سے کہیں زیادہ مضبوط ہوئی ہے۔ خواجہ آصف نے کہا کہ 78 سالہ تاریخ میں پاک فوج کی ایسی جرات کی مثال نہیں ملتی، اور یہ واقعہ آنے والی نسلوں کے لیے فخر کا باعث بنے گا۔ انہوں نے مزید کہا کہ مغربی محاذ پر بھی کامیابی حاصل کی جائے گی، اور نوجوان نسل کو اپنی تاریخ سے روشناس کرانا وقت کی اہم ضرورت ہے۔

پاکستان مسلم لیگ (ن) کے صدر اور سابق وزیراعظم نواز شریف نے پاک بھارت کشیدگی کے تناظر میں ملکی سلامتی کے حوالے سے بیان دیتے ہوئے کہا ہے کہ ہماری بہادر مسلح افواج نے انتہائی پیشہ وارانہ مہارت اور عزم سے سرزمین وطن کا دفاع کیا۔ جاتی امراء میں مسلم لیگ (ن) کے سینیٹر عرفان صدیقی سے ملاقات کے دوران گفتگو کرتے ہوئے نواز شریف نے کہا کہ پارلیمنٹ اور عوامی نمائندوں نے یکجہتی کا مظاہرہ کرتے ہوئے افواج پاکستان کا حوصلہ بڑھایا۔ انہوں نے کہا کہ میڈیا نے بھی سچ پر مبنی بیانیہ دنیا کے سامنے رکھا اور دشمن کے جھوٹ کو مؤثر انداز میں بے نقاب کیا۔ نواز شریف نے قومی اتحاد کو خوش آئند قرار دیتے ہوئے کہا کہ قومی سلامتی کے معاملات پر سیاسی تقسیم سے بالاتر ہو کر ایک آواز میں بولنا وقت کی ضرورت ہے۔ انہوں نے حالیہ کشیدگی میں پاکستان کی سربلندی پر رب کا شکر ادا کرتے ہوئے افواج پاکستان، وزیر اعظم شہباز شریف اور عسکری قیادت کو مبارکباد بھی پیش کی۔