اسلام آباد: صدرِ مملکت آصف علی زرداری سے فیلڈ مارشل سید عاصم منیر نے ایوانِ صدر میں اہم ملاقات کی۔
ایوان صدر سے جاری اعلامیہ کے مطابق، ملاقات میں ملک کی داخلی و خارجی سکیورٹی صورتحال پر تفصیلی تبادلہ خیال کیا گیا۔

فیلڈ مارشل عاصم منیر نے صدرِ مملکت کو افغان طالبان حکومت کے اشتعال انگیز اقدامات کے بعد پیدا ہونے والی حالیہ سکیورٹی صورتحال پر بریفنگ دی۔
انہوں نے پاک فوج کے مؤثر اور بروقت ردِعمل سے بھی صدر کو آگاہ کیا۔

صدر آصف زرداری نے اس موقع پر پاک فوج کی پیشہ ورانہ صلاحیت، بہادری اور تیاری پر مکمل اعتماد کا اظہار کیا۔
انہوں نے قوم کے دفاع اور افغان بارڈر پر حملوں کے فوری تدارک میں فوج کی کارکردگی کو سراہا۔

صدر مملکت کا کہنا تھا کہ پاکستان اپنی قومی خودمختاری اور علاقائی سالمیت کے تحفظ کے لیے ہر ممکن اقدام کرے گا۔

پاک فوج سپن بولدک حملہ ناکام بنانے میں کامیاب ہوگئی۔ سکیورٹی ذرائع کے مطابق افغان طالبان اور فتنہ الخوارج نے سپن بولدک کے قریب چمن میں تین مختلف مقامات پر حملے کیے، تاہم پاک فوج کی مؤثر جوابی کارروائی نے دشمن کے تمام عزائم خاک میں ملا دیے۔ کارروائی کے دوران پندرہ سے بیس دہشتگرد مارے گئے، جب کہ متعدد زخمی ہو کر پسپا ہوگئے۔

ذرائع کے مطابق افغان طالبان اور فتنہ الخوارج کے دہشتگردوں نے معصوم شہریوں اور دیہات کو انسانی ڈھال کے طور پر استعمال کیا، مگر پاک فوج نے انتہائی پیشہ ورانہ حکمتِ عملی سے کارروائی کرتے ہوئے شہری نقصان سے گریز کیا۔

مزید بتایا گیا کہ دہشتگردوں نے پاک افغان دوستی گیٹ کو دھماکے سے اڑا دیا، جو اس بات کا واضح ثبوت ہے کہ افغان طالبان تجارت اور عوامی آمدورفت کے مخالف ہیں۔ چمن میں جاری کشیدگی کے باعث آج تمام تعلیمی ادارے بند کردیے گئے اور پولیو مہم بھی عارضی طور پر معطل کر دی گئی ہے۔

سیکیورٹی فورسز نے سرحدی علاقوں میں گشت بڑھا دیا ہے اور علاقے میں مکمل کنٹرول حاصل کرلیا گیا ہے تاکہ کسی بھی ممکنہ ناخوشگوار واقعے سے بچا جا سکے۔

ذرائع کے مطابق، پاک فوج نے کرم سیکٹر پر افغان طالبان کے ایک اور حملے کی کوشش بھی ناکام بنائی، جس میں آٹھ پوسٹیں اور چھ ٹینک تباہ کیے گئے۔ جوابی کارروائی میں امریکی ساختہ اسلحہ بھی قبضے میں لیا گیا۔

علاوہ ازیں، افغان فورسز کی بلااشتعال فائرنگ سے چمن میں دو بچوں سمیت چار شہری زخمی ہوئے جنہیں قریبی اسپتال منتقل کیا گیا۔ پاک فوج کی جانب سے مؤثر ردعمل کے بعد ویش منڈی اور سپن بولدک کے علاقوں میں دہشتگردوں کے کئی ٹھکانے تباہ کیے گئے، جس میں دو دہشتگرد ہلاک اور دس زخمی ہوئے۔