بھارتی ٹی وی اداکار عامر علی نے ایک انٹرویو میں انکشاف کیا ہے کہ انہیں 14 سال کی عمر میں ممبئی کی ٹرین میں جنسی ہراسانی کا سامنا کرنا پڑا، جس کا ان کی ذہنی کیفیت پر گہرا اثر ہوا۔ اس واقعے کے بعد انہوں نے ٹرین میں سفر کرنا بند کر دیا اور کچھ عرصے تک ہم جنس پرست مردوں کے بارے میں تحفظات رکھے، مگر وقت کے ساتھ ان کے خیالات میں مثبت تبدیلی آئی۔

انہوں نے بتایا کہ قریبی دوستوں کی جانب سے اپنی جنسی شناخت ظاہر کرنے پر انہیں احساس ہوا کہ انفرادی واقعات کی بنیاد پر پوری کمیونٹی کو جج کرنا غلط ہے۔

عامر علی نے اپنی ذاتی زندگی پر بھی بات کی، کہ ان کی اداکارہ سنجیدہ شیخ سے طلاق ہو چکی ہے اور وہ اس وقت اپنی بیٹی آیرا سے رابطے میں نہیں ہیں۔ اداکار کا کہنا تھا کہ وہ اپنے ماضی کو قبول کر کے آگے بڑھنے کی کوشش کر رہے ہیں۔

بیروت: لبنان نے ڈزنی کی نئی لائیو ایکشن فلم ’Snow White‘ کو ملکی سینما گھروں میں نمائش سے روک دیا ہے۔ غیر ملکی میڈیا کے مطابق اس پابندی کی بنیادی وجہ فلم میں اسرائیلی اداکارہ گال گیڈٹ کی کاسٹنگ ہے، جو فلم میں ’ایول کوئین‘ کا کردار ادا کر رہی ہیں۔

یہ فیصلہ لبنان کے وزیر داخلہ احمد الحجّار کی جانب سے کیا گیا ہے، جو ملک کے فلم اور میڈیا مانیٹرنگ بورڈ کی سفارشات کے بعد سامنے آیا۔ مقامی میڈیا رپورٹس کے مطابق، اس اقدام کا تعلق حالیہ اسرائیلی فوجی کارروائیوں سے جوڑا جا رہا ہے، جن میں لبنان میں حزب اللہ کے ٹھکانوں کو نشانہ بنایا جا رہا ہے، اور جن میں عام شہری بھی متاثر ہو رہے ہیں۔

لبنان اور اسرائیل کے درمیان حالیہ کشیدگی کے تناظر میں یہ فیصلہ کیا گیا ہے، جہاں دونوں فریقین کے درمیان عسکری محاذ آرائی شدت اختیار کرتی جا رہی ہے۔ لبنان کی حکومت نے اس حساس موقع پر ایسا مواد روکنے کا فیصلہ کیا ہے جسے عوامی اشتعال یا عدم اطمینان کا باعث بننے کا خدشہ ہو۔

یہ امر قابل ذکر ہے کہ لبنان اس سے قبل بھی اسرائیلی پس منظر رکھنے والے فنکاروں، فلموں یا دیگر مواد پر پابندیاں عائد کرتا رہا ہے، اور یہ پالیسی طویل عرصے سے ملکی موقف کا حصہ رہی ہے۔