وزیر اعظم شہباز شریف نے کہا ہے کہ کسی کو بھی غلط فہمی میں مبتلا نہیں ہونا چاہیے، اگر بھارت نے پانی روکنے کی کوشش کی تو پاکستان پوری طاقت سے جواب دے گا۔ انہوں نے کہا کہ وطن عزیز کے ایک ایک انچ کا دفاع کیا جائے گا اور کسی بھی مس ایڈونچر کا منہ توڑ جواب دیا جائے گا۔

پاکستان ملٹری اکیڈمی کاکول میں کیڈٹس کی پاسنگ آؤٹ تقریب سے بطور مہمان خصوصی خطاب کرتے ہوئے وزیر اعظم شہباز شریف نے کہا کہ پاکستان دہشت گردی کے خلاف فرنٹ لائن ریاست ہے۔ پاکستان ایک ذمہ دار ریاست ہونے کے ناطے غیر جانبدارانہ عالمی تحقیقات کے لیے تیار ہے لیکن کسی قسم کی دھمکیاں ناقابلِ قبول ہیں۔

وزیر اعظم نے کہا کہ بھارت نے پہلگام واقعے کے بعد بے بنیاد اور بغیر ثبوت الزامات لگائے۔ پاکستان نے ہر شکل میں دہشت گردی کو مسترد کیا ہے اور اس کی ہمیشہ مذمت کی ہے۔ دنیا میں دہشت گردی سے سب سے زیادہ متاثر ہونے والا ملک پاکستان ہے جہاں 90 ہزار سے زائد شہریوں نے اپنی جانوں کا نذرانہ دیا، جبکہ پاکستان کی معیشت کو بھی اربوں ڈالر کا نقصان برداشت کرنا پڑا۔

انہوں نے مزید کہا کہ اگر سندھ طاس معاہدے کی خلاف ورزی کرتے ہوئے بھارت نے پاکستان کا پانی روکا تو بھرپور اور پوری قوت سے جواب دیا جائے گا۔ پاکستان کی مسلح افواج ہر قسم کی صورتحال سے نمٹنے کے لیے مکمل طور پر تیار ہیں۔ پاکستان اقوام متحدہ کی سلامتی کونسل کا غیر مستقل رکن ہونے کے ناطے دنیا بھر میں امن و سلامتی کا خواہاں ہے اور اپنی کوششیں جاری رکھے گا۔

وزیر اعظم شہباز شریف نے کہا کہ 25 کروڑ پاکستانی عوام متحد ہیں اور اپنی مسلح افواج کے شانہ بشانہ کھڑے ہیں۔ امن ہماری خواہش ہے لیکن اسے کمزوری نہ سمجھا جائے۔ افغانستان کے حوالے سے بات کرتے ہوئے انہوں نے کہا کہ افغانستان ہمارا برادر اسلامی ملک ہے اور ہماری خواہش ہے کہ ہم پرامن بقائے باہمی کی بنیاد پر تعلقات استوار رکھیں، لیکن بدقسمتی سے افغان سرزمین سے پاکستان میں دہشت گردی کی کارروائیاں ہو رہی ہیں۔

انہوں نے بتایا کہ حال ہی میں نائب وزیر اعظم اسحاق ڈار نے کابل کا دورہ کیا اور افغان حکام کو باور کروایا کہ پاکستان اچھے تعلقات کا خواہاں ہے، لیکن پاکستانی سرزمین پر حملے ناقابلِ برداشت ہیں۔

کشمیر کے حوالے سے شہباز شریف نے کہا کہ بانی پاکستان قائداعظم محمد علی جناح نے کشمیر کو پاکستان کی شہ رگ قرار دیا تھا۔ یہ ایک عالمی تنازع ہے جو کئی دہائیوں سے حل طلب ہے۔ کشمیریوں نے اپنی آزادی کے لیے لاکھوں جانوں کا نذرانہ پیش کیا ہے لیکن عالمی برادری مسئلہ کشمیر کے حل میں ناکام نظر آتی ہے۔

وزیر اعظم نے کیڈٹس سے خطاب کرتے ہوئے کہا کہ آج آپ دنیا کی بہترین افواج میں شامل ہو رہے ہیں، جس کا نظم و ضبط دنیا میں مثالی ہے۔ مسلح افواج بانی پاکستان کے رہنما اصولوں کے مطابق فرائض انجام دے رہی ہیں۔

انہوں نے کہا کہ پاکستان معیشتی میدان میں بحالی کے بعد بھرپور چیلنجز کے باوجود ترقی کی راہ پر گامزن ہے۔ ہم کان کنی، معدنیات، دفاعی پیداوار اور دیگر کئی شعبوں میں غیر ملکی سرمایہ کاری حاصل کر رہے ہیں۔

سینیٹر فیصل واوڈا نے کہا ہے کہ وزیر اعظم شہباز شریف کے پاس ایک سنہری موقع ہے کہ وہ آل پارٹیز کانفرنس (اے پی سی) بلائیں اور اگر ضرورت ہو تو کسی کو ویڈیو لنک کے ذریعے بھی شامل کریں۔ انہوں نے کہا کہ وزیر اعظم کو دنیا کو یہ پیغام دینا چاہیے کہ پوری قوم بھارت کے خلاف متحد ہے۔

پروگرام میں گفتگو کرتے ہوئے فیصل واوڈا نے کہا کہ پاکستان نے بہت کامیابی سے سمارٹ پلے کیا ہے، بھارت کو اس انداز میں مارا ہے کہ ’’سانپ بھی مر گیا اور لاٹھی بھی نہیں ٹوٹی‘‘۔ انہوں نے بتایا کہ بھارت کی ٹریڈ اور ایئر اسپیس بند کرکے اسے 1.2 ارب ڈالر کا معاشی نقصان پہنچانا شروع کر دیا ہے۔ فیصل واوڈا نے خبردار کیا کہ اگر پانی کے مسئلے پر بات آئی تو پاکستان پہلا حملہ کرے گا، جو انتہائی مؤثر ہوگا۔

انہوں نے مزید کہا کہ پاکستان نے پہلا ہدف کامیابی سے حاصل کر لیا ہے۔ فیصل واوڈا نے گزشتہ دنوں بھی کہا تھا کہ پاکستان کی پابندیوں سے بھارت کو روزانہ 500 بلین کا نقصان ہو رہا ہے جبکہ پاکستان کی ٹریڈ انڈیا پر انحصار نہیں کرتی۔ ان کا کہنا تھا کہ اگر مودی نے کوئی مہم جوئی کی تو ’’اسے وہیں بھیجیں گے جہاں وہ چائے بیچتا تھا‘‘۔

فیصل واوڈا نے کہا کہ شہباز شریف کے پاس ایک بہترین موقع ہے کہ وہ ایک جامع حکمت عملی ترتیب دیں۔ انہوں نے کہا کہ بھارت کی کسی بھی قسم کی جارحیت کا بھرپور جواب دینے کی تیاری تھی۔ فیصل واوڈا نے واضح کیا کہ نیوکلیئر ہتھیار استعمال کرنے کا کوئی ارادہ نہیں اور نہ ہی توقع ہے کہ حالات اس نہج تک پہنچیں گے۔ ان کے مطابق لائن آف کنٹرول یا کشمیر میں چھوٹے پیمانے پر جھڑپیں ہو سکتی تھیں، لیکن پاکستان کا جواب ہمیشہ دوگنی طاقت سے ہوگا۔

انہوں نے مزید کہا کہ بھارت کی ہر کارروائی کا جواب بڑھتا چلا جائے گا اور کہاں اور کیسے دیا جائے گا، یہ فیصلہ کمانڈ اینڈ کنٹرول اور سیکیورٹی ادارے کریں گے۔ فیصل واوڈا نے کہا کہ ہم سرحدوں پر جنگ نہیں لڑتے بلکہ فوج اور سیکیورٹی اداروں کو اخلاقی اور سیاسی سپورٹ فراہم کرتے ہیں۔

انہوں نے آرمی چیف کی قیادت کی تعریف کرتے ہوئے کہا کہ اللہ کے کرم سے ہمیں ایک قابل آرمی چیف ملا ہے۔ فیصل واوڈا نے کہا کہ پاکستان نے گولی کی بجائے سمارٹ چال چلی، بھارت کی ایئر اسپیس اور ٹریڈ بند کر کے اسے معاشی نقصان پہنچایا۔ انہوں نے کہا کہ ہماری فوج اللہ اکبر کے نعرے پر چلتی ہے اور اسی جذبے کے تحت دشمن کو جواب دیا گیا ہے۔