دنیا بھر کی طرح پاکستان میں بھی آج غربت کے خاتمے کا عالمی دن منایا جا رہا ہے۔ یہ دن ہمیں یاد دلاتا ہے کہ غربت صرف ایک معاشی مسئلہ نہیں بلکہ ایک سماجی چیلنج بھی ہے جو لاکھوں خاندانوں کی زندگیوں کو متاثر کر رہا ہے۔

پاکستان میں غربت آج بھی ایک زندہ حقیقت ہے جو ہر گلی، ہر بازار اور ہر چوراہے پر کسی نہ کسی صورت میں دکھائی دیتی ہے۔ محنت کش طبقہ دن رات جدوجہد کرتا ہے لیکن ان کے گھروں کے چولہے اکثر ٹھنڈے رہ جاتے ہیں۔ ملک کے کروڑوں مزدوروں کے ہاتھوں کی لکیروں میں پسینہ ہے مگر ان کے دسترخوان خالی ہیں۔

سرکاری اعدادوشمار کے مطابق پاکستان میں غربت کی لکیر کے نیچے زندگی گزارنے والوں کی شرح 45 فیصد تک پہنچ چکی ہے جبکہ گزشتہ برس یہ شرح 39 فیصد تھی۔ بڑھتی ہوئی مہنگائی، بے روزگاری اور کم آمدنی نے عام آدمی کی زندگی کو مزید مشکل بنا دیا ہے۔

ماہرین کے مطابق غربت کے خاتمے کے لیے محض حکومتی پالیسی کافی نہیں، بلکہ ریاست، سماج اور ہر فرد کو اپنا کردار ادا کرنا ہوگا۔ تعلیم، روزگار کے مواقع اور وسائل کی منصفانہ تقسیم وہ اقدامات ہیں جو غربت کے خاتمے کی جانب حقیقی پیش رفت ثابت ہو سکتے ہیں۔

پاکستان میں غربت کے خاتمے کا عالمی دن اس عزم کی تجدید ہے کہ تبدیلی صرف نعروں سے نہیں بلکہ اجتماعی عمل سے آتی ہے۔ اگر معاشرہ متحد ہو کر کام کرے تو غربت کے اندھیروں کو ختم کیا جا سکتا ہے اور ایک خوشحال پاکستان ممکن بنایا جا سکتا ہے۔