پاکستان تحریک انصاف کے بانی چیئرمین اور سابق وزیراعظم عمران خان کی ہمشیرہ علیمہ خان نے دعویٰ کیا ہے کہ حکومت اور عدالتی نظام کی جانب سے عمران خان کو ایک اور مقدمے میں سزا دلوانے کی منصوبہ بندی کی جا رہی ہے۔ یہ بات انہوں نے اڈیالہ جیل کے باہر میڈیا سے گفتگو کرتے ہوئے کہی، جہاں وہ توشہ خانہ ٹو کیس کی سماعت کے لیے پہنچی تھیں۔

علیمہ خان کا کہنا تھا کہ وہ جان بوجھ کر مین اسٹریم میڈیا سے بات نہیں کریں گی کیونکہ وہاں پلانٹ کیے گئے افراد بدتمیزی کے ذریعے اشتعال پیدا کرنا چاہتے ہیں تاکہ بعد میں پی ٹی آئی کارکنان کے خلاف مقدمات درج کیے جا سکیں۔ انہوں نے الزام لگایا کہ میڈیا کو بدتمیزی کے لیے استعمال کیا جا رہا ہے، حالانکہ دو سال سے یہ میڈیا اسی جگہ کوریج کر رہا تھا اور ایسا کوئی واقعہ پیش نہیں آیا تھا۔

علیمہ نے مزید کہا کہ توشہ خانہ ٹو کیس کی سماعت میں جلد بازی سے کام لیا جا رہا ہے کیونکہ عمران خان کو سزا سنانا طے شدہ پلان کا حصہ ہے۔ ان کے مطابق عمران خان خود بھی جانتے ہیں کہ اس کیس میں انہیں سزا سنائی جائے گی۔ انہوں نے الزام عائد کیا کہ القادر ٹرسٹ کیس میں چیف جسٹس سرفراز ڈوگر نے “اپنی نوکری پکی” کر لی ہے مگر کیس سننے سے گریزاں ہیں، حالانکہ انہیں چھ ماہ پہلے ہی ضمانت مل جانی چاہیے تھی۔

علیمہ خان نے دعویٰ کیا کہ جج شاہ رخ ارجمند اور جسٹس ڈوگر کے درمیان باقاعدہ کوآرڈینیشن موجود ہے، اور یہ سب کچھ ایک طے شدہ اسکرپٹ کے مطابق ہو رہا ہے، جس کے تحت عمران خان کو پہلے توشہ خانہ ٹو میں سزا دی جائے گی، اور پھر القادر کیس میں ضمانت دی جائے گی تاکہ قانونی توازن کا دکھاوا کیا جا سکے۔

یہ بیان ایسے وقت میں سامنے آیا ہے جب عمران خان اور ان کی اہلیہ بشریٰ بی بی کے خلاف اہم مقدمات کی سماعتیں اڈیالہ جیل میں ہو رہی ہیں، اور سیاسی ماحول ایک بار پھر کشیدگی کی طرف بڑھ رہا ہے