اڈیالہ جیل میں قید پاکستان تحریک انصاف کے بانی اور سابق وزیراعظم عمران خان کا ایک تفصیلی اور اہم پیغام سامنے آیا ہے، جس میں انہوں نے پارٹی رہنماؤں اور کارکنان کو آپسی اختلافات ختم کرنے اور صرف 5 اگست کی تحریک پر توجہ مرکوز کرنے کی ہدایت کی ہے۔

عمران خان نے واضح کیا ہے کہ اگر کسی نے پارٹی میں گروہ بندی کی تو وہ اسے فوری طور پر تحریک انصاف سے نکال دیں گے۔ ان کا کہنا ہے کہ اس وقت پارٹی کو متحد ہو کر تحریک کو مومینٹم دینا ہوگا، لیکن بدقسمتی سے فی الحال انہیں کوئی ایسا مومینٹم نظر نہیں آ رہا۔

انہوں نے کہا کہ پاکستان کی تاریخ میں کسی سیاسی رہنما کے ساتھ ایسا سلوک نہیں ہوا جیسا ان کے ساتھ ہو رہا ہے۔ انہوں نے دعویٰ کیا کہ انہیں جیل میں قرآن پاک کے لیے وضو کرنے تک کا صاف پانی نہیں دیا جا رہا، ان کی کتابیں، ٹی وی اور اخبار بھی بند ہیں، اور اہل خانہ کی جانب سے بھجوائی گئی کتب کئی ماہ سے جیل حکام نے نہیں دیں۔

عمران خان کا کہنا تھا کہ جیل مینول کے مطابق عام قیدی کی سہولیات بھی انہیں نہیں دی جا رہیں، بچوں سے بات کرانے کی متعدد بار درخواستیں کیں لیکن تاحال کوئی شنوائی نہیں ہوئی۔ وہ صرف اپنی قوم اور آئین کی بالادستی کے لیے یہ سب کچھ جھیل رہے ہیں۔

انہوں نے مزید کہا کہ 8 فروری کے انتخابات میں عوام نے انہیں بغیر انتخابی نشان کے ووٹ دے کر تاریخی اعتماد دیا، اب تحریک انصاف کے ہر رکن کا فرض ہے کہ وہ عوام کی آواز بنے۔

اپنے پیغام میں انہوں نے پارٹی کے ارکان پر زور دیا کہ وہ اندرونی چپقلش ختم کر کے تحریک کو کامیاب بنانے میں کردار ادا کریں۔ انہوں نے واضح کیا کہ:

“میں اپنی نسلوں کے مستقبل کی جنگ لڑ رہا ہوں، ایسے میں اختلافات میرے مقصد کو نقصان پہنچائیں گے۔”

انہوں نے حکومت پر بھی کڑی تنقید کی اور کہا کہ فارم 47 کی حکومت نے 26ویں آئینی ترمیم کے ذریعے عدلیہ کو مفلوج کر دیا ہے، اور مخصوص ججوں سے مرضی کے فیصلے کروائے جا رہے ہیں۔ ان کے مطابق عدلیہ کی آزادی کے بغیر کوئی قوم ترقی نہیں کر سکتی، اور اسی لیے تحریک انصاف کی جدوجہد کا مرکزی نکتہ عدلیہ کی آزادی ہونا چاہیے۔