دریائے سوات میں طغیانی، سوات میں موسلا دھار بارشوں کے بعد دریائے سوات بپھر گیا، جس کے نتیجے میں خواتین اور بچوں سمیت 75 سے زائد افراد سیلابی ریلے میں بہہ گئے۔ ریسکیو حکام نے اب تک 7 افراد کی لاشیں نکال لی ہیں جبکہ 55 افراد کو بحفاظت نکال لیا گیا ہے۔ اب بھی کم از کم 20 افراد لاپتہ ہیں جن کی تلاش کے لیے ریسکیو آپریشن جاری ہے۔

دریائے سوات میں طغیانی تفصیلات کے مطابق سیالکوٹ سے سیر کے لیے آئے ایک ہی خاندان کے 18 افراد اس وقت دریا میں بہہ گئے جب وہ کنارے پر بیٹھے ناشتہ کر رہے تھے۔ اچانک پانی کے بہاؤ میں اضافہ ہوا اور متاثرین کو سنبھلنے کا موقع نہ ملا۔ بائی پاس کے مقام پر 17 افراد ڈوبے، جن میں سے 4 کی لاشیں نکال لی گئیں اور 3 کو بچا لیا گیا۔

واقعے کی ہولناک ویڈیوز بھی منظر عام پر آئی ہیں جن میں افراد کو مٹی کے ٹیلے پر پھنسے دیکھا جا سکتا ہے، جو چند لمحوں میں سیلابی پانی کی نذر ہو گئے۔

ڈپٹی کمشنر سوات کا کہنا ہے کہ دریا کے قریب جانے پر دفعہ 144 نافذ ہے، لیکن سیاح اس کی خلاف ورزی کرتے ہیں۔ متاثرین کے لواحقین نے ریسکیو ٹیموں کی تاخیر پر مایوسی کا اظہار کرتے ہوئے کہا کہ امدادی عملہ تاخیر سے پہنچا جس کے باعث کئی جانیں بچائی نہ جا سکیں۔

دوسری جانب ریسکیو حکام کے مطابق سوات کے مختلف علاقوں بشمول امام ڈھیرئی، غالیگے، مانیار، پنجیگرام اور برہ بامہ خیلہ میں متعدد افراد پھنسے جنہیں بڑی حد تک بحفاظت نکال لیا گیا ہے، تاہم چند مقامات پر سرچ آپریشن تاحال جاری ہے۔

آرمی چیف فیلڈ مارشل عاصم منیر نے کہا ہے کہ نوجوان افسران دیانت، پیشہ ورانہ مہارت اور حب الوطنی کو اپنا شعار بنائیں کیونکہ سول بیوروکریسی ریاستی نظم و نسق میں کلیدی کردار ادا کرتی ہے۔ آئی ایس پی آر کے مطابق فیلڈ مارشل عاصم منیر سے 52ویں کامن ٹریننگ پروگرام کے افسران نے ملاقات کی، جس میں قومی سلامتی، داخلی و خارجی چیلنجز، ادارہ جاتی ہم آہنگی اور قومی یکجہتی پر تفصیلی گفتگو کی گئی۔ افسران نے خیبرپختونخوا، بلوچستان اور کشمیر میں پاک فوج کی کارروائیوں کا بھی مشاہدہ کیا۔ آرمی چیف نے کہا کہ پاک فوج علاقائی امن و استحکام کی ضامن ہے اور نوجوان افسران کو چاہیے کہ وہ اپنی ذمہ داریاں پوری لگن اور جذبے سے ادا کریں۔

اس سے قبل فیلڈ مارشل نے شہید میجر سید معیز عباس شاہ کی نماز جنازہ میں شرکت کی اور ان کی بہادری کو خراجِ عقیدت پیش کیا۔ انہوں نے کہا کہ شہداء کا خون ہماری قومی طاقت کی بنیاد ہے، ان کی قربانیاں ایثار، وفا اور حب الوطنی کی اعلیٰ ترین مثالیں ہیں۔ انہوں نے مزید کہا کہ پوری قوم شہداء کی قربانیوں پر نہ صرف غمزدہ ہے بلکہ ان پر فخر بھی کرتی ہے۔ فیلڈ مارشل نے اس عزم کا اعادہ کیا کہ پاکستان کے دشمن، خواہ اندرونی ہوں یا بیرونی، ان کے ناپاک عزائم کو خاک میں ملانے کے لیے افواجِ پاکستان ہمیشہ تیار رہیں گی