پاکستان میں ایران کے سفیر ڈاکٹر رضا امیری نے واضح کیا ہے کہ ایران پر اگر حملہ ہوا تو جوابی کارروائی اسی مقام پر کی جائے گی جہاں سے حملہ کیا جائے گا۔ سینئر صحافی نعیم اشرف بٹ کو دیے گئے ایک خصوصی انٹرویو میں ایرانی سفیر نے امریکہ کو اسرائیلی جارحیت میں شریک قرار دیا اور کہا کہ اسرائیل کی موجودہ کارروائیاں صیہونی دہشت گردی کی عکاسی ہیں۔

ڈاکٹر رضا امیری نے بھارت کی پالیسی پر بھی مایوسی کا اظہار کیا اور کہا کہ بھارت نے ایران پر حملوں کی مذمت نہیں کی، صرف چند رابطے کیے گئے مگر واضح مؤقف سامنے نہیں آیا۔ اس کے برعکس انہوں نے پاکستان کی بھرپور سفارتی حمایت، عوامی ہمدردی اور میڈیا کے کردار کو سراہا، اور اقوام متحدہ میں ایرانی مؤقف کی حمایت پر پاکستانی حکومت کا شکریہ ادا کیا۔

ایرانی سفیر کا کہنا تھا کہ ایران کا جوہری پروگرام مکمل طور پر پرامن ہے اور اس بات کی تصدیق عالمی ایجنسی آئی اے ای اے بھی متعدد بار کر چکی ہے۔ یہاں تک کہ امریکی انٹیلیجنس رپورٹس میں بھی اس کی توثیق موجود ہے۔ انہوں نے کہا کہ ایران کے سپریم لیڈر ایٹمی ہتھیاروں کو حرام قرار دے چکے ہیں، اس کے باوجود ایران پر الزامات عائد کیے جانا محض سیاسی اور صیہونی دشمنی کی بنیاد پر ہے۔

انہوں نے کہا کہ ایران کے خلاف جنگ تھوپی گئی ہے، ایران محض اپنے دفاع کا حق استعمال کر رہا ہے۔ انہوں نے کہا کہ اسرائیل کا دائرہ محدود ہے جبکہ ایران ایک پورا براعظم ہے، اسرائیل ہمارے کتنے علاقوں پر حملہ کرے گا؟ انہوں نے طنزیہ انداز میں کہا کہ اسرائیلی شہری بنکروں میں کتوں کے ساتھ رہنے پر مجبور ہیں جبکہ ایران کے شہری ڈرون اور میزائلوں کا سامنا کھلے آسمان تلے کر رہے ہیں۔

آخر میں ایرانی سفیر نے کہا کہ جب تک اسرائیلی جارحیت جاری رہے گی، ایران بھی اپنے دفاع سے پیچھے نہیں ہٹے گا، اور جو ممالک اس جارحیت میں اسرائیل کی مدد کر رہے ہیں، انہیں اس جنگ کی طوالت کا ذمہ دار سمجھا جائے گا۔

سپریم کورٹ آف پاکستان کے آئینی بینچ نے مخصوص نشستوں کے کیس میں پاکستان تحریک انصاف (پی ٹی آئی) کو 39 اراکین اسمبلی کی بنیاد پر فوری مخصوص نشستیں دینے کی استدعا مسترد کر دی۔ سماعت کے دوران جسٹس محمد علی مظہر نے ریمارکس دیے کہ کیا الیکشن کمیشن نے 39 اراکین کو پی ٹی آئی کا باضابطہ طور پر ڈکلیئر کیا ہے؟

سنی اتحاد کونسل کے وکیل فیصل صدیقی نے دلائل دیتے ہوئے کہا کہ ان کے موکلین کو 39 اراکین کی بنیاد پر تناسب طے کر کے مخصوص نشستیں نہیں دی گئیں، جو کہ قانون اور انصاف کے اصولوں کے خلاف ہے۔ انہوں نے عدالت سے اپیل کی کہ فیصلے پر مکمل عملدرآمد کرایا جائے۔

الیکشن کمیشن کے ڈی جی لاء نے عدالت کو بتایا کہ مخصوص نشستوں کی تقسیم کے لیے مجموعی نشستوں کے تناسب کا فارمولا طے کیا جا رہا ہے، اور تاحال کسی بھی پارٹی کو مخصوص نشستیں الاٹ نہیں کی گئیں۔ جسٹس حسن اظہر رضوی نے استفسار کیا کہ کیا دیگر جماعتوں کو نشستیں الاٹ کی گئی ہیں؟ جس پر ڈی جی لاء نے جواب دیا کہ نہیں، ابھی کسی کو نشستیں نہیں دی گئیں۔

جسٹس جمال خان مندوخیل نے ریمارکس دیے کہ 80 نشستوں کے تناسب سے تو پی ٹی آئی کی 22 یا 23 مخصوص نشستیں بنتی ہیں، جبکہ جسٹس محمد علی مظہر نے سوال اٹھایا کہ جب 39 اراکین کو پی ٹی آئی کا تسلیم کیا گیا ہے، تو ان کے حساب سے مخصوص نشستیں کیوں نہیں دی جا رہیں؟

الیکشن کمیشن کے وکیل نے مؤقف اپنایا کہ پارلیمنٹ نے قانون سازی کی ہے جس کے مطابق اگر کسی امیدوار نے کاغذات نامزدگی میں اپنی سیاسی وابستگی ظاہر کر دی ہو تو اس میں تبدیلی نہیں کی جا سکتی، اور یہی مؤقف عدالت میں نظرثانی درخواست کے طور پر زیر التوا ہے۔

وکیل فیصل صدیقی نے کہا کہ اگر عدالتی فیصلے پر عملدرآمد نہیں ہوتا تو یہ سپریم کورٹ کے مستقبل کے لیے خطرناک اشارہ ہوگا۔ بعد ازاں عدالت نے درخواست مسترد کرتے ہوئے سماعت کل صبح ساڑھے گیارہ بجے تک ملتوی کر دی۔ پی ٹی آئی کے وکیل سلمان اکرم راجہ کل دلائل کا آغاز کریں گے۔