لاہور:
پاکستانی شوبز انڈسٹری کی معروف اداکارہ اور ماڈل علیزہ شاہ نے سوشل میڈیا سے کنارہ کشی اختیار کرنے کا اعلان کر دیا ہے۔

علیزہ شاہ، جو فلم ’سپر اسٹار‘ سے فلمی دنیا میں داخل ہوئیں اور ڈرامہ ’عہدِ وفا‘ کے ذریعے شہرت کی بلندیوں تک پہنچیں، حالیہ برسوں میں اپنے لباس، اسٹائل اور میوزک ویڈیوز کی وجہ سے مسلسل سوشل میڈیا ٹرولنگ کا نشانہ بنتی رہی ہیں۔

حال ہی میں علیزہ شاہ نے سوشل میڈیا پر اپنے پیغام میں اعتراف کیا کہ وہ بظاہر مضبوط دکھائی دیتی ہیں، لیکن حقیقت میں ذہنی دباؤ اور مشکلات سے گزر رہی ہیں۔ انہوں نے کہا کہ انہوں نے کبھی بھی غیر اخلاقی راستہ اختیار نہیں کیا، اس کے باوجود شدید تنقید کا سامنا کرنا پڑ رہا ہے، جو انہیں ذہنی طور پر متاثر کر رہی ہے۔

اداکارہ نے اپنی انسٹاگرام اسٹوری پر “She Quits” لکھ کر سوشل میڈیا چھوڑنے کا باضابطہ اعلان کیا اور اپنے تمام سوشل میڈیا پلیٹ فارمز سے پوسٹس بھی حذف کر دی ہیں۔ علیزہ شاہ نے سوشل میڈیا کو “جہنم” سے تعبیر کرتے ہوئے اس پلیٹ فارم سے دوری اختیار کرنے کا فیصلہ کیا ہے۔

علیزہ شاہ کے اس اعلان پر سوشل میڈیا صارفین کی جانب سے ملا جلا ردعمل سامنے آیا ہے۔ کچھ افراد نے اسے محض توجہ حاصل کرنے کی کوشش قرار دیا، جب کہ کچھ نے ہمدردی کا اظہار کیا۔ ایک صارف نے لکھا: ’’اگر سوشل میڈیا پر آتی ہو تو تنقید کا سامنا کرنے کا حوصلہ بھی رکھو۔‘‘ جبکہ ایک اور صارف نے کہا: ’’لگتا ہے علیزہ کسی ذہنی دباؤ کا شکار ہیں، انہیں مدد اور دعا کی ضرورت ہے۔‘‘

مداحوں کی بڑی تعداد نے علیزہ شاہ کے لیے نیک تمناؤں اور دعاؤں کا اظہار کرتے ہوئے امید ظاہر کی ہے کہ وہ جلد اپنی زندگی میں سکون اور خوشی حاصل کریں گی۔

ممبئی:
معروف بھارتی اداکار اور اپنے “بابو بھائیآ” کے مشہور کردار سے شہرت پانے والے پاریش راول نے حال ہی میں ایک حیران کن انکشاف کیا ہے، جس نے مداحوں اور سوشل میڈیا صارفین کو حیرت میں ڈال دیا۔

بھارتی میڈیا رپورٹس کے مطابق پاریش راول نے ایک بھارتی یوٹیوب چینل کو دیے گئے انٹرویو میں بتایا کہ فلم ’گھاتک‘ کی شوٹنگ کے دوران گھٹنے کی شدید چوٹ لگنے کے بعد انہوں نے 15 دن تک اپنا پیشاب پیا تاکہ چوٹ جلدی ٹھیک ہو سکے۔

اداکار نے واقعہ کی تفصیل بتاتے ہوئے کہا کہ فلم کے ایک سین میں ساتھی اداکار راکیش پانڈے نے انہیں مچھلی مارکیٹ میں گھسیٹنا تھا۔ چونکہ سیٹ پر فراہم کردہ چپلیں پھسلن والی تھیں، وہ بار بار پھسل رہے تھے۔ ایک موقع پر جب راکیش نے پوری قوت سے انہیں گھسیٹا تو ان کے گھٹنے میں چوٹ لگ گئی۔

حادثے کے بعد ٹنّو آنند اور ڈینی ڈینزونگپا انہیں فوری طور پر ناناوتی اسپتال لے گئے۔ پاریش راول کے مطابق اس وقت انہیں لگا کہ ان کا فلمی کیریئر شاید ختم ہو جائے۔ اسپتال میں ان سے اجے دیوگن کے والد اور مشہور ایکشن ڈائریکٹر ویرو دیوگن ملنے آئے اور ایک روایتی علاج تجویز کیا۔

ویرو دیوگن نے مشورہ دیا کہ: “صبح اٹھ کر سب سے پہلے اپنا پیشاب پیو، یہی طریقہ پرانے فائٹرز استعمال کرتے ہیں، کوئی تکلیف نہیں ہو گی۔ تاہم رات کو شراب، گوشت اور تمباکو سے پرہیز کرنا ہوگا۔”

پاریش راول نے اس مشورے پر عمل کرتے ہوئے مسلسل 15 دن تک یہ طریقہ اپنایا۔

ان کے اس انکشاف کے بعد سوشل میڈیا پر شدید ردعمل دیکھنے میں آ رہا ہے۔ صارفین نے طنزیہ اور مزاحیہ انداز میں تبصرے کیے ہیں، جبکہ کچھ نے انہیں تنقید کا نشانہ بھی بنایا ہے۔