اسلام آباد:
فیڈرل بورڈ آف ریونیو (ایف بی آر) نے جائیداد پر عائد فیڈرل ایکسائز ڈیوٹی (FED) ختم کرنے کی سمری کابینہ کو ارسال کر دی ہے۔

میڈیا رپورٹس کے مطابق، ذرائع نے بتایا ہے کہ کابینہ کی منظوری کے بعد نوٹیفکیشن جاری کیا جائے گا۔ سمری میں بتایا گیا ہے کہ فائلرز پر 3٪، لیٹ فائلرز پر 5٪ اور نان فائلرز پر 7٪ ایف ای ڈی عائد کی گئی تھی، جس کے نتیجے میں رئیل اسٹیٹ ٹرانزیکشنز میں نمایاں کمی دیکھنے میں آئی۔

رپورٹ کے مطابق، وزیراعظم شہباز شریف پہلے ہی اس ایف ای ڈی کو ختم کرنے کی منظوری دے چکے ہیں، تاہم عدالت میں ایف ای ڈی کے خلاف کیس بھی زیرِ سماعت ہے۔

ذرائع کا یہ بھی کہنا ہے کہ ایف بی آر کو پراپرٹی ٹرانزیکشنز سے ایف ای ڈی کی وصولی کے درست اور شفاف اعداد و شمار موصول نہیں ہو رہے تھے، اسی لیے اس فیصلے پر نظرِ ثانی کی گئی ہے۔ علاوہ ازیں، یہ بھی بتایا گیا ہے کہ بجٹ کے بعد پراپرٹی ویلیوایشن ٹیبلز میں تبدیلی کی جائے گی۔

فی الحال جائیداد پر مندرجہ ذیل ٹیکسز لاگو ہیں:

کیپیٹل گین ٹیکس (CGT)

کیپٹل ویلیو ٹیکس (CVT)

ایڈوانس انکم ٹیکس

سیکشن 7E کے تحت ڈیمڈ انکم ٹیکس

خاص طور پر ڈیمڈ رینٹل انکم پر 20 فیصد ٹیکس لاگو کیا جاتا ہے، جو 2.5 کروڑ روپے سے زائد مالیت کی جائیدادوں پر نافذ ہے۔

یہ اقدام رئیل اسٹیٹ سیکٹر میں جمود کو توڑنے اور سرمایہ کاری کے رجحان کو فروغ دینے کے لیے کیا جا رہا ہے۔

اسلام آباد میں وزیر اعظم شہباز شریف کی زیر صدارت قومی سلامتی کمیٹی کا اہم اجلاس منعقد ہوا جو اختتام پذیر ہو گیا۔ اجلاس میں بھارت کے حالیہ جارحانہ اقدامات، خاص طور پر پہلگام واقعے کے بعد پیدا ہونے والی صورت حال کا تفصیلی جائزہ لیا گیا۔ وزیر اعظم کی سربراہی میں ہونے والے اس اجلاس میں اعلیٰ عسکری اور سیاسی قیادت نے شرکت کی، جن میں نائب وزیر اعظم اسحاق ڈار، وفاقی وزیر اطلاعات عطا اللہ تارڑ، وزیر قانون اعظم نذیر تارڑ، مشیر خارجہ طارق فاطمی اور اٹارنی جنرل منصور عثمان اعوان شامل تھے۔

اجلاس میں بھارت کی جانب سے لگائے گئے تمام الزامات کو یکسر مسترد کر دیا گیا اور سندھ طاس معاہدے کی خلاف ورزی پر عالمی سطح پر قانونی کارروائی کرنے کا فیصلہ کیا گیا۔ قومی سلامتی کمیٹی نے بھارتی سفارتی اور آبی جارحیت کا بھرپور اور موثر جواب دینے کے لیے متعدد سفارشات منظور کیں۔ کمیٹی نے مسلح افواج کی تیاریوں پر مکمل اطمینان کا اظہار کرتے ہوئے فیصلہ کیا کہ اگر بھارت کی جانب سے کسی قسم کی جارحیت یا مہم جوئی کی گئی تو اس کا منہ توڑ جواب دیا جائے گا۔

اجلاس میں بھارت کی جانب سے واہگہ بارڈر بند کرنے، پاکستانی شہریوں کے ویزے منسوخ کرنے، سفارتی عملے میں کمی، اور سندھ طاس معاہدے کی معطلی جیسے اقدامات کا تفصیلی جائزہ لیا گیا۔ ان تمام یک طرفہ اقدامات کے ردعمل میں پاکستان کی ممکنہ حکمت عملی پر مشاورت کی گئی۔

اجلاس کے دوران خطے کی مجموعی سکیورٹی صورتحال، سرحدی کشیدگی اور داخلی سلامتی کے معاملات پر بھی غور کیا گیا۔ کمیٹی نے واضح کیا کہ پاکستان عالمی فورمز پر اپنے مؤقف کو بھرپور انداز میں اجاگر کرے گا اور بھارتی پروپیگنڈے کا ہر سطح پر مؤثر جواب دیا جائے گا۔ ذرائع کا کہنا ہے کہ وزیر اعظم شہباز شریف اس معاملے پر جلد پارلیمان کو بھی اعتماد میں لیں گے اور ممکنہ طور پر بھارت کے خلاف مشترکہ قرارداد پیش کی جائے گی۔