سکیورٹی فورسز نے پاک افغان بارڈر پر خوارج کی دراندازی کی کوشش کو ناکام بنا دیا، جس کے نتیجے میں 8 خارجی دہشت گرد ہلاک اور 4 زخمی ہوئے۔

مسلح افواج کے شعبہ تعلقات عامہ (آئی ایس پی آر) کے مطابق، سکیورٹی فورسز نے شمالی وزیرستان کے حسن خیل علاقے میں افغان سرحد سے خوارج کی دراندازی کی کوشش کو روکا۔ اس دوران شدید فائرنگ کے تبادلے میں 8 خارجی دہشت گرد مارے گئے جبکہ 4 زخمی ہوئے۔

آئی ایس پی آر کی جانب سے جاری کردہ اعلامیے میں کہا گیا ہے کہ سکیورٹی فورسز نے علاقے میں ممکنہ خارجیوں کے خاتمے کے لیے سینیٹائزیشن آپریشن بھی کیا۔ فورسز سرحدوں کی حفاظت اور دہشت گردی کی لعنت کو ختم کرنے کے لیے پُرعزم ہیں۔ پاکستان افغان عبوری حکومت سے بار بار مؤثر بارڈر منیجمنٹ کا مطالبہ کرتا رہا ہے، اور افغان عبوری حکومت کو چاہیے کہ وہ اپنی سرزمین کو خارجیوں کے استعمال سے روکنے کی ذمہ داری پوری کرے، تاکہ یہ یقینی بنایا جا سکے کہ خارجی افغانستان کی سرزمین کو پاکستان کے خلاف استعمال نہ کریں۔

بلوچستان نیشنل پارٹی کے سربراہ سردار اختر مینگل نے صوبے کی تمام شاہرائیں احتجاجاً بند کرنے کا اعلان کیا ہے۔ اپنے ایک بیان میں انہوں نے کہا کہ مستونگ میں سیکیورٹی فورسز نے لانگ مارچ کا محاصرہ کر رکھا ہے اور ممکنہ طور پر ہمارے خلاف آپریشن بھی کیا جا سکتا ہے۔ اس صورتحال کے خلاف ہم صوبے کی تمام شاہراہوں کو بند کر رہے ہیں، اور اگر کوئی خون خرابہ یا انتشار ہوتا ہے تو اس کی ذمہ داری حکومت اور انتظامیہ پر ہوگی۔

سردار اختر مینگل نے مزید کہا کہ ہم اس وقت لکپاس پر موجود ہیں اور سیکیورٹی فورسز نے ہمیں مکمل طور پر گھیر رکھا ہے۔ ہمیں واضح طور پر نظر آ رہا ہے کہ ہمارے خلاف ایک آپریشن ہونے والا ہے، اسی لیے میں تمام اضلاع میں قومی شاہراہوں کو احتجاجاً بند کرنے کی اپیل کرتا ہوں تاکہ دنیا اس ناانصافی کو دیکھ سکے۔ ہم مکمل طور پر پرامن ہیں اور اپنے عزم پر قائم رہیں گے۔ اگر کوئی بھی ناخوشگوار واقعہ پیش آتا ہے تو اس کی ذمہ داری حکومت اور مقامی انتظامیہ پر عائد ہوگی۔