وزیراعظم شہباز شریف کی زیر صدارت مشترکہ مفادات کونسل (سی سی آئی) کے اجلاس میں دریائے سندھ سے نہریں نکالنے کے منصوبے کو ختم کرنے کی منظوری دے دی گئی۔ اجلاس میں فیصلہ کیا گیا کہ نہروں کی تعمیر کے مسئلے پر ایک ٹیکنیکل کمیٹی تشکیل دی جائے گی جو آگے کے لائحہ عمل کی تیاری کرے گی۔

اجلاس میں چاروں صوبوں کے وزرائے اعلیٰ، وفاقی وزراء اسحاق ڈار، خواجہ آصف، امیر مقام اور دیگر 25 خصوصی شرکاء نے شرکت کی۔ ڈیڑھ گھنٹے تک جاری رہنے والے اجلاس میں 6 نکاتی ایجنڈے پر غور کیا گیا۔

کونسل نے کینالز سے متعلق 7 فروری کو ہونے والے ایکنک فیصلے کو مسترد کرتے ہوئے معاملہ دوبارہ انڈس ریور سسٹم اتھارٹی (ارسا) کو بھیجنے کا فیصلہ کیا۔ اعلامیہ کے مطابق، سی سی آئی نے متفقہ طور پر فیصلہ کیا کہ باہمی افہام و تفہیم کے بغیر کوئی نئی نہریں تعمیر نہیں کی جائیں گی، اور جب تک تمام صوبے متفق نہ ہوں، وفاقی حکومت اس حوالے سے کوئی اقدام نہیں کرے گی۔

اجلاس میں زور دیا گیا کہ تمام صوبوں کو شامل کرتے ہوئے زرعی پالیسی اور پانی کے انتظام کے بنیادی ڈھانچے کے لیے ایک طویل المدتی اور متفقہ روڈ میپ تیار کیا جائے۔ سی سی آئی نے اس بات کو دہرایا کہ تمام صوبوں کے پانی کے حقوق 1991 کے معاہدے اور 2018 کی واٹر پالیسی کے تحت مکمل طور پر محفوظ ہیں۔

اجلاس کے دوران پہلگام حملے کے بعد بھارت کی جانب سے کیے گئے یکطرفہ، غیر قانونی اور غیر ذمہ دارانہ اقدامات کی شدید مذمت کی گئی۔ اعلامیہ میں پوری قوم کو اتحاد اور یکجہتی کا پیغام دیا گیا اور کہا گیا کہ پاکستان ایک پرامن اور ذمہ دار ریاست ہے، لیکن اپنے دفاع کی مکمل صلاحیت رکھتا ہے۔

سیکورٹی ذرائع کے مطابق پاک فوج نے لائن آف کنٹرول پر بھارتی جاسوسی کی کوشش ناکام بناتے ہوئے بھمبر کے مناور سیکٹر میں بھارتی کواڈ کاپٹر کو مار گرایا ہے۔ دشمن کی جانب سے فضائی حدود کی خلاف ورزی اور کواڈ کاپٹر کے ذریعے جاسوسی کی کوشش کی گئی تھی، جسے پاک فوج کی بروقت اور مؤثر کارروائی سے ناکام بنا دیا گیا۔

ذرائع کا کہنا ہے کہ یہ واقعہ پاک فوج کی پیشہ ورانہ مہارت، مستعدی اور دفاعی تیاری کا عملی ثبوت ہے۔ پاک فوج ہر قسم کی جارحیت کا فوری اور مؤثر جواب دینے کی صلاحیت رکھتی ہے اور کسی بھی ناپاک سازش کو خاک میں ملانے کے لیے مکمل طور پر تیار ہے۔

سیکورٹی حکام نے واضح کیا کہ پہلگام واقعے کے بعد بھارت کی جانب سے اشتعال انگیزی اور دھمکیوں کا سلسلہ جاری ہے، اور اب وہ فضائی حدود کی خلاف ورزی جیسے اقدامات پر بھی اتر آیا ہے۔ تاہم پاکستان کی مسلح افواج اپنی سرزمین کے تحفظ کے لیے ہمہ وقت چوکس اور پرعزم ہیں۔

پوری قوم اپنی بہادر افواج کے شانہ بشانہ کھڑی ہے اور دشمن کو ہر محاذ پر منہ توڑ جواب دینے کے لیے متحد ہے۔

یاد رہے کہ بھارت نے حالیہ دنوں میں پہلگام واقعے کے بعد پاکستان پر بلا ثبوت الزام تراشی کی تھی اور سندھ طاس معاہدے کو یکطرفہ طور پر معطل کرنے کا اعلان کیا تھا۔ پاکستان نے نہ صرف اس واقعے کی شدید مذمت کی بلکہ وزیراعظم شہباز شریف نے اس کی غیرجانبدارانہ تحقیقات کی پیشکش بھی کی، اس مؤقف کے ساتھ کہ پاکستان ہر ممکن تعاون کے لیے تیار ہے۔