سپریم کورٹ کے آئینی بینچ کے سربراہ جسٹس امین الدین خان نے سویلین کے ملٹری ٹرائل کے خلاف انٹرا کورٹ اپیل کی سماعت کے دوران کہا ہے کہ قانون کے غلط استعمال کی بنیاد پر اسے کالعدم قرار نہیں دیا جا سکتا۔ اگر ایک جرم فوجی کرتا ہے اور وہی جرم عام آدمی بھی کرتا ہے تو ان کے ٹرائلز کو الگ جگہ پر کیسے رکھا جا سکتا ہے؟ جسٹس امین الدین خان کی سربراہی میں 7 رکنی آئینی بینچ نے فوجی عدالتوں میں سویلینز کے ٹرائل سے متعلق انٹرا کورٹ اپیل کی سماعت کی۔

سماعت کے دوران سزا یافتہ ارزم جنید کے وکیل سلمان اکرم راجہ نے عدالت میں اپنے دلائل پیش کرتے ہوئے کہا کہ ایف بی علی کیس میں انیس سو باسٹھ کے آئین کے تحت فیصلہ کیا گیا۔ جسٹس جمال مندو خیل نے پوچھا کہ آرمی ایکٹ کے تحت فوجی عدالتوں کے کیا اختیارات ہیں؟ کیا کوئی شخص جو فوج کا حصہ نہیں ہے، صرف جرم کی بنیاد پر فوجی عدالت کے دائرہ کار میں آ سکتا ہے؟ سلمان اکرم راجہ نے کہا کہ ایف بی علی کیس میں بھی یہ بات واضح کی گئی تھی کہ سویلنز کا ٹرائل بنیادی حقوق کی تکمیل کی بنیاد پر ہی ممکن ہے۔

جسٹس محمد علی مظہر نے پوچھا کہ ایف بی علی خود بھی ایک سویلین تھے، تو ان کا کورٹ مارشل کیسے ہوا؟ سلمان اکرم راجہ نے جواب دیا کہ عدالت نے یہ فیصلہ کیا تھا کہ ٹرائل میں بنیادی حقوق کی فراہمی ضروری ہے اور اس میں بنیادی حقوق کی خلاف ورزی نہیں ہونی چاہیے۔

وزیراعظم شہباز شریف نے کہا ہے کہ جنوری میں مہنگائی کی شرح 9 سال کی کم ترین سطح 2.4 فیصد پر پہنچ گئی ہے۔ انہوں نے زرعی ٹیکس سے متعلق قانون سازی کرنے پر صدر زرداری، چیئرمین بلاول بھٹو زرداری اور چاروں صوبوں کے وزرائے اعلیٰ کا شکریہ ادا کیا۔ وفاقی کابینہ کے اجلاس میں خطاب کرتے ہوئے انہوں نے بتایا کہ جنوری 2024ء میں مہنگائی کی شرح 28.73 فیصد تھی، جبکہ دسمبر 2024ء میں یہ 4.1 فیصد تک کم ہوئی۔ مہنگائی کی اس بتدریج کمی کو خوش آئند قرار دیتے ہوئے انہوں نے کہا کہ اب ہماری کوشش ہے کہ ہم معاشی ترقی کی جانب بڑھیں، جس کے لیے تمام متعلقہ وزارتوں کی توجہ ضروری ہے۔ یہ ہمارے لیے ایک چیلنج ہے کہ ہم معاشی نمو کو کس طرح بڑھا سکتے ہیں۔

وزیراعظم شہباز شریف نے کابینہ کے اراکین کو آگاہ کیا کہ سعودی عرب نے ایک سال کی موخر ادائیگی پر 1.2 ارب ڈالر کا تیل درآمد کرنے کی سہولت فراہم کی ہے۔ یہ سہولت دسمبر 2023ء میں ختم ہوئی تھی، لیکن سعودی ولی عہد کی ہدایت پر ایک وفد نے پاکستان کا دورہ کیا اور تیل کی درآمد کے لیے ایک سال کے لیے 1.2 ارب ڈالر کی موخر ادائیگی کی سہولت دوبارہ فراہم کی گئی ہے۔ شہباز شریف نے کہا کہ اس سعودی سہولت کے نتیجے میں ہمارے زرمبادلہ کے ذخائر میں اضافہ ہوگا۔