اسلام آباد:
اسلام آباد ہائی کورٹ کے جج جسٹس بابر ستار کا عبوری آرڈر قائم مقام چیف جسٹس کے ڈویژن بینچ سے معطل ہونے پر نیا تنازع کھڑا ہو گیا۔ رپورٹس کے مطابق جسٹس بابر ستار کی ہدایت کے باوجود ڈپٹی رجسٹرار جوڈیشل نے کیس ان کے بینچ میں مقرر نہیں کیا۔

جسٹس بابر ستار نے آرڈر معطل ہونے کے باوجود کیس کی سماعت کی اور 8 صفحات پر مشتمل تحریری حکمنامہ جاری کر دیا۔ اپنے حکم میں جسٹس بابر ستار نے کہا کہ 26 مارچ کا کیس مقرر کرنے کا آرڈر ڈویژن بینچ میں چیلنج ہی نہیں ہوا تھا، تو وہ معطل کیسے ہو سکتا ہے۔ انہوں نے واضح کیا کہ 12 اور 26 مارچ کے آرڈرز عبوری نوعیت کے تھے اور کیس کا حتمی فیصلہ ابھی باقی ہے۔

عدالت نے کہا کہ سپریم کورٹ اپنے متعدد فیصلوں میں واضح کر چکی ہے کہ چیف جسٹس کے پاس زیر سماعت مقدمے میں انتظامی مداخلت کا اختیار نہیں۔ عدالت نے سوال اٹھایا کہ عدالتی حکم کے باوجود کیس مقرر نہ کرنے پر ڈپٹی رجسٹرار کے خلاف کارروائی کیوں نہ کی جائے۔ جسٹس بابر ستار نے ڈپٹی رجسٹرار جوڈیشل اور ڈپٹی رجسٹرار آئی ٹی کو آئندہ سماعت پر ذاتی حیثیت میں طلب کر لیا۔

جسٹس بابر ستار نے پوچھا کہ ڈپٹی رجسٹرار آئی ٹی بتائیں کہ کس کے حکم پر جوڈیشل آرڈرز ویب سائٹ سے ہٹائے گئے۔ تحریری حکم میں کہا گیا کہ ڈپٹی رجسٹرار جوڈیشل نے پیش کیا کہ آرڈر ڈویژن بینچ نے معطل کر دیا تھا، تاہم بادی النظر میں انہوں نے عدالتی حکم کی خلاف ورزی کی۔ ڈپٹی رجسٹرار نے جواز پیش کیا کہ ڈویژن بینچ کی ہدایت کے مطابق کیس مقرر نہیں کیا جا سکتا تھا۔

جسٹس بابر ستار نے کہا کہ بظاہر ڈویژن بینچ کی درست معاونت نہیں کی گئی کہ آرڈر عبوری نوعیت کا ہے۔ انہوں نے اپنے آرڈر میں لاء ریفارمز آرڈیننس 1972 کے سیکشن 3 کا حوالہ دیا اور کہا کہ صرف سنگل بنچ کے حتمی فیصلے کے خلاف ہی انٹرا کورٹ اپیل دائر ہو سکتی ہے۔ آئینی عدالت کی کارروائی میں ریکارڈ طلب کر کے یا کسی ہدایت کے ذریعے رکاوٹ ڈالنا ناقابلِ قبول ہے۔

انہوں نے مزید کہا کہ کیس 7 مئی کو آئندہ سماعت کے لیے مقرر کیا جاتا ہے، چاہے اسے کاز لسٹ میں شامل کیا جائے یا نہ کیا جائے، سماعت ہر صورت ہوگی۔ آرڈر کی کاپی تمام فریقین کو بھجوانے کی بھی ہدایت کی گئی تاکہ وہ آئندہ سماعت پر حاضری یقینی بنائیں۔

جسٹس بابر ستار نے اپنے حکم میں کہا کہ اگر ڈویژن بینچ ریکارڈ ارسال نہ کرے تو رجسٹرار آفس نئی فائل مرتب کرے۔ انہوں نے ڈی جی امیگریشن اینڈ پاسپورٹ اور ڈائریکٹر نیب کو توہین عدالت کا شوکاز نوٹس بھی جاری کر رکھا ہے۔ یاد رہے کہ قائم مقام چیف جسٹس سرفراز ڈوگر کی سربراہی میں ڈویژن بینچ نے جسٹس بابر ستار کا آرڈر معطل کر دیا تھا۔

اسلام آباد:
سندھ حکومت کی درخواست پر مشترکہ مفادات کونسل (سی سی آئی) کا اجلاس آج وزیراعظم ہاؤس میں منعقد ہوگا۔ مشترکہ مفادات کونسل سیکریٹریٹ نے اجلاس کے انعقاد کا باقاعدہ نوٹیفکیشن جاری کر دیا ہے۔ اجلاس میں چاروں صوبوں کے وزرائے اعلیٰ، وفاقی وزرا اور دیگر 25 شرکاء کو خصوصی دعوت دی گئی ہے۔

سندھ کے سینئر وزیر شرجیل میمن نے بتایا کہ حکومت سندھ کی گزارش پر وزیر اعظم نے سی سی آئی کا اجلاس آج ہی طلب کر لیا، حالانکہ یہ اجلاس دو مئی کو ہونا تھا۔ ان کا کہنا تھا کہ وزیر اعظم کی زیر صدارت یہ اجلاس آج شام اسلام آباد میں ہوگا اور اس میں نہروں کے متنازعہ معاملے پر فیصلہ متوقع ہے۔ سندھ کی نمائندگی وزیراعلیٰ سندھ سید مراد علی شاہ کریں گے۔

شرجیل میمن کے مطابق، بلاول بھٹو زرداری اور وزیر اعظم شہباز شریف کے درمیان ہونے والی بات چیت کے نتیجے میں کینالوں کے مسئلے کا حل نکل آئے گا۔ واضح رہے کہ وزیر اعظم نے متنازع نہروں کا معاملہ مشترکہ مفادات کونسل میں لے جانے کا اعلان کرتے ہوئے پہلے دو مئی کو اجلاس بلانے کا فیصلہ کیا تھا۔

پاکستان پیپلز پارٹی کے وفد سے ملاقات کے بعد بلاول بھٹو زرداری کے ہمراہ مشترکہ پریس کانفرنس کرتے ہوئے وزیر اعظم شہباز شریف نے کہا تھا کہ جب تک مشترکہ مفادات کونسل میں باہمی رضامندی حاصل نہیں ہوتی، اس وقت تک نہریں تعمیر نہیں کی جائیں گی۔ بلاول بھٹو نے سندھ کے عوام کے تحفظات سننے اور ان پر عملدرآمد کے عزم پر وزیر اعظم کا شکریہ ادا کیا تھا اور کہا تھا کہ وزیر اعظم نے احتجاج کے نکات کو کافی حد تک ایڈریس کیا ہے۔ مشترکہ مفادات کونسل کے اجلاس میں اب ان فیصلوں کی توثیق متوقع ہے۔