بھارت میں حکومتِ پاکستان کے سرکاری ایکس (سابقہ ٹوئٹر) اکاؤنٹ کو بلاک کیے جانے کی اطلاعات سامنے آئی ہیں۔ میڈیا رپورٹس کے مطابق، بھارتی حکومت نے پہلگام واقعے کے بعد پاکستان کے خلاف سخت اقدامات کا اعلان کیا ہے، جن میں حکومتِ پاکستان کے سرکاری ایکس اکاؤنٹ کی بھارت میں رسائی روکنے کا اقدام بھی شامل ہے۔ اس کے علاوہ، پاکستان کے دفاعی، بحری اور فضائی مشیروں کو ناپسندیدہ شخصیات قرار دے کر ایک ہفتے میں ملک چھوڑنے کا حکم دیا گیا ہے، جب کہ بھارتی حکومت نے اپنے فوجی مشیروں کو بھی اسلام آباد سے واپس بلانے کا فیصلہ کیا ہے۔

بھارتی میڈیا کے مطابق، وزیراعظم نریندر مودی کی زیر صدارت کابینہ کمیٹی برائے سلامتی (CCS) کا اجلاس ہوا جس میں پاکستان کے خلاف کئی اہم اقدامات کی منظوری دی گئی۔ ان اقدامات میں سفارتی تعلقات کی سطح میں کمی، ویزہ سہولیات کی مکمل معطلی، دفاعی مشیروں کی بے دخلی، اور اٹاری واہگہ سرحد کی بندش شامل ہے۔

اجلاس میں یہ بھی طے پایا کہ دونوں ممالک کے سفارت خانوں میں عملے کی تعداد 55 سے کم کرکے 30 کر دی جائے گی، اور یہ فیصلہ یکم مئی تک مکمل طور پر نافذ العمل ہوگا۔

بھارتی وزارت خارجہ کے سیکریٹری وکرم مِسری نے پریس کانفرنس کے دوران اعلان کیا کہ بھارت نے سارک ویزہ استثنیٰ سکیم کو معطل کرتے ہوئے پاکستانی شہریوں کو جاری تمام ویزے فوری طور پر منسوخ کر دیے ہیں۔ اس کے ساتھ ہی، اٹاری کی واحد زمینی سرحدی چوکی کو بھی بند کر دیا گیا ہے، اور پاکستان سے بھارت میں موجود افراد کو یکم مئی سے قبل ملک چھوڑنے کی ہدایت جاری کی گئی ہے۔

بھارتی حکومت نے سندھ طاس معاہدے کو بھی معطل کرنے کا اعلان کیا ہے۔ یہ معاہدہ 1960ء میں پاکستان اور بھارت کے درمیان پانی کی تقسیم سے متعلق عالمی ثالثی اور ورلڈ بینک کی ضمانت کے تحت طے پایا تھا، اور اس کی معطلی کو ماہرین بین الاقوامی قوانین کی سنگین خلاف ورزی قرار دے رہے ہیں۔

پاکستانی حکام نے بھارتی اقدامات کو غیر ذمہ دارانہ، اشتعال انگیز اور خطے کے امن کے لیے خطرناک قرار دیا ہے اور اعلان کیا ہے کہ اس کا سفارتی، قانونی اور سیاسی سطح پر بھرپور جواب دیا جائے گا۔

حکومتِ پاکستان نے بھارت کے جھوٹے پروپیگنڈے کا بھرپور سفارتی جواب دینے کا فیصلہ کر لیا ہے۔ ذرائع کے مطابق، پہلگام واقعے کے بعد بھارتی حکومت کے جھوٹے بیانیے اور ڈرامائی اقدامات کو عالمی سطح پر بے نقاب کیا جائے گا۔ اس سلسلے میں تمام بین الاقوامی فورمز پر بھارت کے خلاف مؤثر آواز بلند کی جائے گی تاکہ عالمی برادری کو مودی حکومت کی اصل حقیقت سے آگاہ کیا جا سکے۔

ذرائع کا کہنا ہے کہ بھارت کی جانب سے ممکنہ الزامات یا پروپیگنڈے کا جواب پوری تیاری اور سخت سفارتی حکمت عملی کے تحت دیا جائے گا۔ وفاقی حکومت نے فیصلہ کیا ہے کہ بھارت کی ہر جارحیت کا مؤثر، سنجیدہ اور بروقت جواب دیا جائے گا۔ ذرائع نے بتایا کہ سندھ طاس معاہدے کے حوالے سے بھارت کو واضح پیغام دیا جائے گا کہ وہ اس معاہدے کو یکطرفہ طور پر معطل یا ختم نہیں کر سکتا۔ پاکستان اس معاملے پر عالمی بینک سے رجوع کرنے اور ثالثی عدالت میں جانے کا حق محفوظ رکھتا ہے۔

ذرائع کے مطابق، حکومت سفارتی محاذ پر بھرپور تیاری کر رہی ہے اور بھارت کے ساتھ تعلقات کے حوالے سے مزید فیصلے حالات کے مطابق کیے جائیں گے۔ قومی سلامتی کمیٹی کے آئندہ اجلاس میں اہم فیصلے متوقع ہیں جن کی روشنی میں دفتر خارجہ سفارتی سطح پر اقدامات کرے گا۔ حکومت کی جانب سے عالمی سطح پر بھارتی حکمت عملیوں کو ناکام بنانے کے لیے مربوط سفارتی مہم چلانے کا فیصلہ کیا گیا ہے۔

ذرائع کا یہ بھی کہنا ہے کہ وزیراعظم پارلیمنٹ کو اعتماد میں لیں گے اور امکان ہے کہ بھارت کے حالیہ اقدامات کے خلاف مشترکہ قرارداد پارلیمنٹ سے منظور کرائی جائے۔ اس کے ساتھ ساتھ وفاقی حکومت کی مشاورت جاری ہے اور وزیراعظم کی منظوری سے آئندہ کی حکمت عملی طے کی جائے گی۔

حکومتی ذرائع کے مطابق، پاکستان بھارت کے ساتھ سفارتی تعلقات پر نظر ثانی کرنے جا رہا ہے، اور قومی سلامتی کمیٹی کی منظوری کے بعد اسلام آباد میں بھارتی ہائی کمیشن کے عملے کی تعداد میں کمی کی جائے گی اور عملے کو واپس بھیجا جا سکتا ہے۔

حکومت نے واضح کر دیا ہے کہ پاکستان نہ صرف سفارتی بلکہ دفاعی طور پر بھی مکمل تیار ہے اور کسی بھی ممکنہ بھارتی جارحیت کو مؤثر اور فیصلہ کن انداز میں ناکام بنایا جائے گا۔