سپریم کورٹ کے آئینی بینچ کی طرف سے پی ٹی آئی احتجاج کے دوران ہلاکتوں پر از خود نوٹس لینے سے انکار کردیا گیا ہے۔ میڈیا ذرائع کے مطابق پی ٹی آئی کے احتجاج کے دوران ہلاکتوں کے معاملے پر آئینی بنچ نے ازخود نوٹس لینے کی استدعا کو مسترد کردیا ہے، موسمیاتی تبدیلی اتھارٹی کے حوالے سے پیش کیے گئے کیس میں ایڈیشنل ایڈووکیٹ جنرل خیبرپختواہ ویڈیو لنک کے ذریعے شامل ہوئے، انہوں نے کہا کہ’گزشتہ روز دونوں طرف سے ہی ہلاکتیں ہوئیں،جن پر آئینی بنچ ازخود نوٹس لے سکتا ہے، لہذا آئینی بنچ ان واقعات پر ازخود نوٹس لے‘۔
جسٹس مسرت ہلالی نے ریمارکس دیتے ہوئے کہا کہ ’سپریم کورٹ میں حاضر ہوکر سیاسی باتیں نہ کریں‘، جسٹس امین الدین نے کہا کہ ’جو معاملہ ہمارے سامنے سرے سے موجود ہی نہیں ہم اسے نہیں دیکھ سکتے، جسٹس جمال خان مندوخیل نے کہا ’یہ معاملہ ہمارے سامنے نہیں ہم اس پر بات نہیں کرنا چاہتے‘، اس پر آئینی بنچ نے ازخود نوٹس کی استدعا رد کردی۔

گزشتہ روز سپریم کورٹ آف پاکستان کی طرف سے طلباء یونین بحال کرنے کی درخواست سماعت کیلئے منظور کرلی گئی جسٹس امین الدین خان کی سربراہی میں 6 رکنی آئینی بینچ نے کیس کی سماعت کی اور سٹوڈنٹس یونین کی بحالی سے متعلق درخواست پر رجسٹرار آفس کے اعتراضات کو ختم کر دیا، سپریم کورٹ کے آئینی بینچ نے سٹوڈنٹس یونین کی بحالی کے حوالے سے درخواست پراعتراضات ختم کرتے ہوئے اٹارنی جنرل کو نوٹس بھی جاری کیا، سپریم کورٹ نے درخواست پر صوبائی ایڈووکیٹ جنرل اور ایڈوکیٹ جنرل اسلام آباد کو بھی نوٹس جاری کیا اور رجسٹرار آفس کو درخواست پر نمبر لگانے کا حکم بھی دیا۔

اس کے علاوہ سپریم کورٹ کے آئینی بینچ میں موجود جسٹس جمال خان مندوخیل نے تلور کے شکار کے خلاف درخواست پر سماعت سے معذرت کی، جس وجہ سے تلور کے شکار کے خلاف کیس کی سماعت کرنے والا آئینی بینچ ختم گیا، جسٹس جمال خان مندوخیل کا کہنا ہے کہ میں’بلوچستان ہائیکورٹ میں تلور شکار کیخلاف کیس کی سماعت کرچکا ہوں، لہذا میں بینچ میں شامل نہیں ہوسکتا‘۔