موجودہ حکومت کو آئی ایم ایف پروگرام کے 3 بڑے اہداف حاصل کرنے میں بڑی ناکامی کا سامنا کرنا پڑ رہا ہے،2652 ارب کا ٹیکس ریونیو حاصل نہیں ہوسکا ،85ارب کا شارٹ فال اور 22 سٹرکچرل بینچ مارک پر جولائی 2025 میں عملدرآمد ہوگا،آئی ایم ایف نے پاکستان کو پروگرام کے 22 سٹرکچرل بینچ مارک دئیے ہیں جن کو اچیو کرنا ہے، ان میں سے 18وفاقی حکومت اور 4 سٹیٹ بینک آف پاکستان کے حوالے سے ہیں۔
میڈیا ذرائع کے مطابق حکومت آئی ایم ایف پروگرام کے پہلے جائزے میں تین بڑے اہداف حاصل کرنے میں ابھی تک ناکام رہی ہے ۔نیٹ ٹیکس ریونیو، تعلیم اور صحت کے اخراجات کیلئے طے شدہ ہدف اور مقامی کرنسی ڈیبٹ سکیورٹیز کی میچورٹی بھی حاصل نہیں کی جاسکی۔ تعلیم اور صحت کے شعبے پر 685 ارب روپے کے اخراجات کا ہدف حاصل نہیں ہو ا اور ستمبر 2024 تک مقامی کرنسی ڈیبٹ سکیورٹیز اسٹاک کی میچوریٹی حاصل کرنے میں بھی ناکامی کا منہ دیکھنا پڑا ہے

دستاویزات کے مطابق ستمبر 2024کے آخر تک آئی ایم ایف کے ساتھ طے شدہ اہداف میں سے 3 اہم اہداف حاصل نہیں ہوسکے جن میں پاکستان کو 2652 ارب روپے کا نیٹ ٹیکس ریونیو حاصل نہیں ہوا اور 85 ارب روپے کا شارٹ فال بھی رہا ہے۔واضح رہے کہ اس سے قبل عالمی مالیاتی فنڈ(آئی ایم ایف )نے کلائمٹ فنانسنگ کی مد میں ایک ارب ڈالر کا قرض حاصل کرنے کیلئے شرائط عائد کی تھیں۔
آئی ایم ایف کے حالیہ دورے میں پاکستان نے ایک ارب ڈالرکی کلائمیٹ فنانسنگ پر بھی زور دیا تھا اور ٹیم کو کلائمیٹ فنانسنگ کی ضرورتوں سے بھی آگاہ کیا تھا۔آئی ایم ایف کی طرف سے کہا گیا ہے کہ نیشنل اڈاپٹیشن پلان کے مطابق قبل ازوقت وارننگ سسٹم اقدامات بھی شرائط میں ہی شامل تھیں۔فنانسنگ ملنے پر موجودہ قرض پروگرام اس وقت تاریخ کا سب سے بڑا پروگرام ہو گا۔
اور ایک ارب ڈالر کلائمیٹ فنانسنگ ای ایف ایف ڈیبٹ پروگرام کے اقتصادی جائزہ کے بعد ملے گی۔آئی ایم ایف کو تھرڈ سہ ماہی میں نئے کلائمٹ فنانسنگ رعایتی قرضے پر راضی کیا جائے گا۔ آئی ایم ایف کی طرف سے ایک ارب ڈالر کلائمیٹ فنانسنگ پہلے اقتصادی جائزے کے بعد ملیں گے۔ذرائع وزارت خزانہ نے کہا کہ معاشی ٹیم کو اہداف مکمل ہونے پر مارچ میں اقتصادی جائزے کے بعد فنانسنگ کا کہا گیا تھا۔
وزارت خزانہ نے کہا کہ جی ڈی پی کا ایک فیصد سالانہ کلائمیٹ چینج پر خرچ کرنے کی تجویز سے آئی ایم ایف متفق ہو گیا تھا۔ جی ڈی پی کا ایک فیصد موسمیاتی تبدیلی، قدرتی آفات سے نمٹنے کیلئےاستعمال کیا جائے گا۔نیشنل اڈاپٹیشن پلان کے تحت قبل ازوقت وارننگ سسٹم اقدامات بھی شرائط کا حصہ تھیں۔آئی ایم ایف مشن کے ساتھ حالیہ گفتگو کے دوران کلائمیٹ فنانسنگ پر زیادہ پیشرفت نہ ہوسکی۔ اور آئی ایم ایف نے فنانسنگ کیلئے اہداف پر عملدرآمد کرنے کی شرط عائد کر دی تھی۔