وفاقی وزیر اطلاعات و نشریات عطاء اللہ تارڑ کا کہنا ہے کہ کنٹینر پر موجود شخص نماز نہیں پڑھ رہا تھا بلکہ ٹک ٹاک بنا رہا تھا، اور یہ شخص منڈی بہاؤالدین کا رہائشی ہے، میں بالکل بھی علی امین گنڈاپور کی تقریر پر ردعمل نہیں دینا چاہتا کیوں کہ وہ ایک بزدل آدمی ہے اور دو دفعہ بھاگ چکا ہے، البتہ اس بار گرفتار تمام ملزمان کو سزائیں ملیں گی، ملک میں انتشار اور تشدد کی سیاست کی اجازت کسی بھی طرح نہیں دی جائے گی۔
پریس کانفرنس کرتے ہوئے انہوں نے مزید کہا کہ ملک کے تمام چینلز نے پی ٹی آئی کو بھاگتے ہوئے بھی دکھایا ہے، پی ٹی آئی کے کارکنوں نے غزہ کی تصاویر سوشل میڈیا پر شیئر کیں، غیر ملکی میڈیا جو تصاویر دکھا رہا ہے وہ اے آئی سے بنی ہیں، غزہ میں فلسطینیوں کی بنی ہوئی ویڈیوز کو ڈی چوک کا بتا کر دکھایا جا رہا ہے، غیر ملکی میڈیا آرٹیفیشل انٹیلی جنس سے بنی ہوئی تصاویر چلا رہا ہے، پہلے یہ کہا گیا کہ سنائپر شاٹ مارے گئے اور پھر فائرنگ کی بات بھی کی گئی، تحریک انصاف کی جماعت ابھی تک سنائپرز یا سیدھی فائرنگ کی کوئی ویڈیو سامنے کیوں نہیں لا سکی، سوشل میڈیا پر پی ٹی آئی کی لاشوں سے متعلق جھوٹا پراپیگنڈہ کرنے والوں کے خلاف قانونی کارروائی ہوگی۔

عطاتارڑ نے کہا کہ جو اسلام آباد احتجاج میں شامل تھے، اور جن لوگوں کی ویڈیوز سامنے آئی ہیں وہ کسی صورت قانون سے نہیں بچ سکیں گے، جو پکڑے گئے ہیں وہ اپنے منطقی انجام تک ضرور پہنچیں گے ان کی رہائی کسی صورت نہیں ہوگی، ہماری فورسز کو کسی بھی احتجاج میں براہ راست لائیو ایمونیشن نہیں دیا جاتا، ہماری فورسز کے پاس اسلحہ نہیں تھا، کوئی ایک ویڈیو ہی دکھا دیں جس میں فورسز کے کسی فرد نے گولی چلائی ہو، یہ ملک کے باہر فوج کے خلاف باتیں کررہے ہیں، ہم نے ایک سیل بنا دیا ہے جو جھوٹی ویڈیوز کے فیکٹ چیک کرکے بتائے گا۔
وفاقی وزیر اطلاعات کا مزید کہنا تھا کہ پاکستان کی معیشت اس وقت ترقی کی راہ پر گامزن ہے، پاکستان میں 7 ماہ کے عرصہ کے دوران کئی غیر ملکی وفود نے دورہ کیا ، پی آئی اے کی یورپ کے لیے پروازوں کی بحالی پاکستان کے لیے ایک انتہائی اچھی خبر ہے جب کہ ملکی زرمبادلہ کے ذخائر بھی 11 ارب ڈالر سے تجاوز کر چکے ہیں۔