پاکستان تحریک انصاف کے رہنماء اور سابق وزیر خارجہ شاہ محمود قریشی کو دل کی تکلیف کے باعث جیل سے پنجاب انسٹی ٹیوٹ آف کارڈیالوجی منتقل کر دیا گیا ہے۔ ڈاکٹروں کے مطابق ان کی طبیعت صبح اچانک بگڑ گئی اور انہیں آکسیجن کی کمی کا سامنا ہوا، جس پر فوری طبی امداد دی گئی۔ شاہ محمود قریشی اس وقت پی آئی سی کے سی سی یو تھری میں زیر علاج ہیں۔ ان کی صاحبزادی مہر بانو قریشی نے عوام سے والد کی صحتیابی کے لیے دعا کی اپیل کی، جبکہ ان کے صاحبزادے زین قریشی نے بھی تصدیق کی کہ مزید چند روز تک ڈاکٹرز ان کی طبی نگرانی جاری رکھیں گے۔ شاہ محمود قریشی کی صحت کے حوالے سے عوامی اور سیاسی حلقوں میں تشویش پائی جاتی ہے۔

پاک-بھارت کشیدگی کے باوجود افغانستان سے خشک میوہ جات سے لدے 5 تجارتی ٹرک واہگہ کے راستے بھارت روانہ ہو گئے۔ سیکیورٹی ذرائع کے مطابق یہ ٹرک کئی ہفتوں سے نیشنل لاجسٹک سیل کے تحت واہگہ پورٹ پر کھڑے تھے اور بالآخر انہیں بھارت بھیجنے کی اجازت دے دی گئی۔ پاکستانی ڈرائیوروں نے یہ سامان بھارتی حدود میں منتقل کیا جنہیں بھارتی حکومت نے 24 گھنٹے کے انٹری پرمٹ جاری کیے تھے۔ افغان حکومت نے گزشتہ ماہ پاکستان سے درخواست کی تھی کہ 150 ٹرکوں کو بھارت بھیجنے کی اجازت دی جائے، جس پر پاکستان نے یکم مئی کو مشروط اجازت دے دی تھی۔ تاہم سرحدی کشیدگی کے باعث معاملہ مؤخر رہا۔ اب مزید ٹرک بھی آئندہ دنوں میں بھارت بھیجے جائیں گے۔ یاد رہے کہ پاک-بھارت تجارت 2019 سے معطل ہے، مگر افغانستان اور بھارت کے درمیان ٹرانزٹ ٹریڈ واہگہ کے راستے جاری ہے۔