محسن نقوی خیبرپختونخوا کے گورنر فیصل کریم کنڈی سے ملاقات میں کہا کہ پاکستان کی سرزمین سے فتنہ الہندوستان کا خاتمہ کرکے دم لیں گے۔ وفاقی وزیر داخلہ نے واضح کیا کہ بھارتی حمایت یافتہ دہشت گردوں کے مذموم عزائم کسی صورت کامیاب نہیں ہوں گے۔ ملاقات میں صوبے میں بڑھتے ہوئے دہشت گردی کے واقعات، امن و امان کی صورتِ حال اور جاری انٹیلی جنس بیسڈ آپریشنز پر تفصیلی تبادلہ خیال کیا گیا۔

وفاقی وزیر محسن نقوی نے کہا کہ خیبرپختونخوا کے عوام اور قانون نافذ کرنے والے اداروں نے دہشت گردی کے ناسور کے خلاف غیر معمولی قربانیاں دی ہیں۔ انہوں نے اس بات پر زور دیا کہ فتنہ الہندوستان کے دہشت گرد پاکستان کی سلامتی اور اتحاد کے دشمن ہیں اور ان کے خلاف کارروائیاں بھرپور انداز میں جاری رہیں گی۔ محسن نقوی نے مزید کہا کہ وفاقی حکومت صوبے میں امن و امان کے قیام کے لیے سیکیورٹی فورسز کے ساتھ مکمل تعاون فراہم کر رہی ہے، تاکہ دہشت گردی کے باقی ماندہ نیٹ ورک کو ختم کیا جا سکے۔

گورنر خیبرپختونخوا فیصل کریم کنڈی نے کہا کہ صوبے کے عوام امن کے داعی ہیں اور پائیدار ترقی کے لیے امن ناگزیر ہے۔ انہوں نے اس عزم کا اظہار کیا کہ صوبے میں انٹیلیجنس بیسڈ آپریشنز کو مزید مؤثر اور مربوط بنایا جائے گا۔ دونوں رہنماؤں نے پولیس ٹریننگ سینٹر اور نادرا آفس ڈی آئی خان پر حملے میں شہید ہونے والے اہلکاروں کو خراج عقیدت پیش کیا اور کہا کہ ان کی قربانیاں رائیگاں نہیں جائیں گی۔

قطر کی وزارتِ خارجہ نے پاکستان اور افغانستان کے درمیان جنگ بندی سے متعلق اپنے سرکاری بیان میں ایک اہم تبدیلی کرتے ہوئے “سرحد” یعنی بارڈر کا لفظ حذف کر دیا، جس نے سفارتی سطح پر نئی بحث کو جنم دیا ہے۔ عالمی میڈیا کے مطابق ابتدائی بیان میں کہا گیا تھا کہ جنگ بندی دونوں برادر ممالک کے درمیان سرحدی کشیدگی کو کم کرنے میں مدد دے سکتی ہے، تاہم بعد میں جاری کردہ تازہ بیان میں صرف “دونوں برادر ممالک کے درمیان کشیدگی” کا ذکر کیا گیا، اور “سرحد” کا لفظ ہٹا دیا گیا۔

ماہرین کے مطابق قطر کا یہ اقدام سفارتی لحاظ سے محتاط پالیسی کی عکاسی کرتا ہے، کیونکہ افغانستان تاریخی طور پر ڈیورنڈ لائن کو بین الاقوامی سرحد کے طور پر تسلیم کرنے سے انکار کرتا رہا ہے۔ دوسری جانب پاکستان ہمیشہ سے اس لائن کو اپنی باضابطہ سرحد مانتا آیا ہے۔ سوشل میڈیا پر بڑھتی تنقید کے بعد قطر نے بیان کو اپ ڈیٹ کیا تاکہ وہ کسی ایک فریق کے مؤقف کی حمایت کرتا محسوس نہ ہو۔

قطر نے امید ظاہر کی ہے کہ یہ جنگ بندی دونوں ممالک کے درمیان پائیدار امن کے لیے ایک مضبوط بنیاد ثابت ہوگی۔ افغان وزیرِ دفاع محمد یعقوب مجاہد نے واضح کیا کہ دوحہ مذاکرات میں ڈیورنڈ لائن پر کوئی بات نہیں ہوئی اور اسے ایک “خیالی سرحد” قرار دیا۔ سابق افغان نائب صدر امراللہ صالح نے دعویٰ کیا کہ عوامی دباؤ کے باعث قطر نے لفظ “بارڈر” ہٹایا۔

یہ واقعہ اس وقت پیش آیا جب پاکستان اور افغانستان کے درمیان سرحدی کشیدگی میں اضافہ دیکھا جا رہا ہے، خصوصاً چمن اور طورخم کے علاقوں میں۔ قطر کا کردار ایک ثالث ملک کے طور پر ابھر رہا ہے جو خطے میں امن و استحکام کے لیے کوششیں کر رہا ہے۔