آزاد کشمیر احتجاج: حکومتی مذاکراتی وفد مظفرآباد پہنچ گیا، عوامی ایکشن کمیٹی سے بات چیت شروع

آزاد کشمیر میں جاری احتجاجی تحریک کے پیش نظر حکومت کی جانب سے تشکیل دیا گیا اعلیٰ سطحی مذاکراتی وفد مظفرآباد پہنچ گیا ہے۔ وفد میں وزیراعظم آزاد کشمیر، سینیٹر رانا ثنا اللہ، طارق فضل چوہدری، وفاقی وزیر احسن اقبال، سردار یوسف، پیپلز پارٹی کے رہنما راجہ پرویز اشرف اور قمر زمان کائرہ شامل ہیں۔

مظفرآباد آمد پر رانا ثنا اللہ نے میڈیا سے گفتگو کرتے ہوئے کہا کہ ہم عوامی ایکشن کمیٹی کے جائز مطالبات سننے اور مسائل کا حل نکالنے کے لیے یہاں آئے ہیں۔ وزیراعظم کی ہدایت ہے کہ تمام معاملات بات چیت کے ذریعے سلجھائے جائیں۔ انہوں نے کہا کہ تشدد کے راستے ہمیشہ نقصان دہ ہوتے ہیں، اس سے مسائل حل ہونے کے بجائے مزید پیچیدہ ہوجاتے ہیں۔ کشمیر کے عوام ہمارے بھائی ہیں اور ان کے ساتھ بیٹھ کر پُرامن حل نکالا جائے گا۔

وفاقی وزیر احسن اقبال نے روانگی سے قبل کہا کہ کچھ عناصر پاکستان کے امن اور استحکام کو سبوتاژ کرنا چاہتے ہیں، تاہم حکومت عوامی ایکشن کمیٹی کے مطالبات سن کر ان کے حل کے لیے سنجیدہ کوشش کرے گی۔

اس موقع پر وزیراعظم آزاد کشمیر نے بھی وزیراعظم شہباز شریف کا شکریہ ادا کیا کہ وہ بیرون ملک موجود ہونے کے باوجود صورتحال پر مسلسل نظر رکھے ہوئے ہیں۔

یاد رہے کہ آزاد کشمیر میں عوامی ایکشن کمیٹی کے احتجاجی مظاہروں کے دوران پرتشدد واقعات میں اب تک 3 پولیس اہلکاروں سمیت 6 شہری جاں بحق اور 72 پولیس اہلکار زخمی ہوچکے ہیں۔