عظمیٰ بخاری کی پریس کانفرنس: پی ٹی آئی صرف سوشل میڈیا پر

پنجاب کی وزیراطلاعات عظمیٰ بخاری نے ایک اہم پریس کانفرنس سے خطاب کرتے ہوئے کہا کہ پاکستان تحریک انصاف (پی ٹی آئی) کی جانب سے سیلاب متاثرین کے لیے “ایک ٹکے کا ریلیف کا کام” بھی دیکھنے میں نہیں آیا، بلکہ انہوں نے صرف سوشل میڈیا بریگیڈ بنا رکھی ہے جو عوام کو گمراہ کرنے اور انتشار پھیلانے میں مصروف ہے۔

عظمیٰ بخاری نے کہا کہ اس کے برعکس وزیراعلیٰ پنجاب مریم نواز جگہ جگہ خود جا کر عوام کے مسائل سن رہی ہیں اور ریسکیو و ریلیف کے عمل کی براہ راست نگرانی کر رہی ہیں۔ ان کا کہنا تھا کہ پنجاب کی عوام کو یہ دیکھنا چاہیے کہ کون ان کے ساتھ کھڑا ہے اور کون صرف سیاست کر رہا ہے۔

ڈی جی پی آر آفس میں پریس کانفرنس کے دوران انہوں نے کہا کہ پنجاب میں حالیہ مون سون بارشوں اور سیلاب کی شدت کے باوجود صورتحال کافی حد تک بہتر ہو چکی ہے، تاہم ہیڈ تریموں پر اب بھی شدید دباؤ ہے، جس پر حکومت پوری توجہ دے رہی ہے۔

انہوں نے کہا کہ پنجاب کی تاریخ میں یہ پہلا موقع ہے کہ کوئی وزیراعلیٰ خود سیلاب زدہ علاقوں میں پہنچ کر عوام کو ریسکیو کر رہی ہیں، لیکن ایک مخصوص جماعت صرف سوشل میڈیا پر فضول قسم کی باتیں کر کے عوام کو الجھانے کی کوشش کر رہی ہے۔ “جب بھی قوم مشکل میں ہوتی ہے، یہ مخلوق انتشار پھیلانے آ جاتی ہے،” انہوں نے کہا۔

وزیراطلاعات نے مزید کہا کہ اربن فلڈنگ سے نمٹنے کے لیے ہر ممکن اقدامات کیے گئے تھے، تاہم بھارت کی جانب سے بغیر اطلاع پانی چھوڑنے کے باعث ہنگامی صورتحال پیدا ہوئی۔ اس کے باوجود وزیراعلیٰ پنجاب کی ہدایت پر فوری ریلیف آپریشن شروع کیا گیا۔

عظمیٰ بخاری نے کہا کہ حکومت پنجاب متاثرہ انسانوں کے ساتھ ساتھ مال مویشیوں کے تحفظ کو بھی اہمیت دے رہی ہے۔ “مریم نواز نے ثابت کیا ہے کہ وہ عوام کو کسی بھی مشکل وقت میں اکیلا نہیں چھوڑیں گی۔” انہوں نے کہا کہ جب تک ایک ایک متاثرہ فرد کو دوبارہ اس کے گھر نہیں بسا دیا جاتا، ریلیف آپریشن جاری رہے گا۔

لاہور میں خیمہ بستیاں نہ ہونے کے سوال پر انہوں نے واضح کیا کہ تمام ریلیف کیمپس اسکولوں میں قائم کیے گئے ہیں تاکہ شہریوں کو سہولت میسر آ سکے۔