پاک فوج کے سربراہ فیلڈ مارشل عاصم منیر کے حالیہ دورہ امریکہ کو پاکستان اور امریکہ کے تعلقات میں ایک نئی جہت قرار دیا جا رہا ہے۔ بین الاقوامی میڈیا اور تجزیہ کاروں کے مطابق یہ دورہ پاکستان کی سفارتی حکمت عملی کا اہم سنگ میل ہے۔ امریکی جریدے واشنگٹن پوسٹ نے اپنی رپورٹ میں کہا ہے کہ فیلڈ مارشل عاصم منیر کی قیادت میں پاکستان نے خارجہ پالیسی کے محاذ پر نمایاں کامیابیاں حاصل کی ہیں۔ رپورٹ کے مطابق بدلتے ہوئے عالمی منظرنامے اور سابق صدر ڈونلڈ ٹرمپ کے ممکنہ دوبارہ انتخاب کے باعث پاکستان کو درپیش چیلنجز کو دانشمندانہ حکمت عملی کے ذریعے موقع میں بدلا گیا اور وائٹ ہاؤس کے ساتھ قریبی روابط کو فروغ دیا گیا۔

مزید برآں، واشنگٹن پوسٹ نے پاکستان کے انسداد دہشتگردی اقدامات کو سراہتے ہوئے اسے ایک بڑی کامیابی قرار دیا، جس کے نتیجے میں امریکہ نے کالعدم تنظیم ’بی ایل اے‘ کو عالمی دہشتگرد قرار دے دیا۔ رپورٹ میں بتایا گیا کہ پاکستان نے امریکہ کو معدنی وسائل کی ترقی اور کرپٹو کرنسی کے منصوبوں میں شراکت داری کی پیشکش بھی کی ہے۔ اس کے علاوہ، صدر ڈونلڈ ٹرمپ نے پاکستان میں سرمایہ کاری میں دلچسپی ظاہر کی ہے جس سے دونوں ممالک کے درمیان معاشی تعلقات کا نیا دور شروع ہو سکتا ہے۔ بھارت کے ساتھ جنگ بندی کے بعد پاک، امریکا تعلقات میں مزید بہتری خطے میں امن و استحکام کے لیے خوش آئند پیش رفت ہے۔ یہ تمام سفارتی کامیابیاں نہ صرف پاکستان کے عالمی کردار کو مزید مؤثر بنا رہی ہیں بلکہ دنیا میں اس کی مثبت شبیہ کو بھی اجاگر کر رہی ہیں۔

وزیراعلیٰ پنجاب مریم نواز نے جاپان کے وزارتِ خارجہ کے سینئر اسٹیٹ منسٹر مایا جی ٹاکوما سے ٹوکیو میں ملاقات کی جس میں تجارت، سرمایہ کاری اور دیگر شعبوں میں دوطرفہ تعاون بڑھانے پر اتفاق کیا گیا۔ مریم نواز نے کہا کہ جاپان ایک ایسا ملک ہے جس کی معاشی و ٹیکنالوجیکل ترقی دنیا کے لیے مثال ہے اور پنجاب میں بھی جاپان کے ترقیاتی ماڈل کو اپنانا چاہتے ہیں تاکہ عوام کو جدید سہولتیں فراہم کی جا سکیں۔ ملاقات میں قدرتی آفات سے نمٹنے کے حوالے سے بھی بات ہوئی جس پر مایا جی ٹاکوما نے پاکستان میں سیلاب سے ہونے والے جانی نقصان پر افسوس کا اظہار کیا اور مریم نواز کو پنجاب کی پہلی خاتون وزیر اعلیٰ بننے پر مبارکباد پیش کی۔ انہوں نے کہا کہ پاکستان میں جاری 120 سے زائد منصوبے قابلِ تعریف ہیں اور جاپان ہمیشہ پاکستان کو قریبی دوست ملک سمجھتا ہے۔ مریم نواز نے جاپانی قیادت کو سرمایہ کاری کے لیے اپنی حکومت کی مراعاتی پالیسی سے آگاہ کیا اور کہا کہ جاپان کی تعمیراتی ٹیکنالوجی اور قدرتی آفات سے نمٹنے کا ماڈل پاکستان کے لیے بے حد مددگار ثابت ہوگا۔ ملاقات کے اختتام پر دونوں رہنماؤں نے تعلقات کو مزید مضبوط بنانے کے عزم کا اظہار کیا۔