فیس بک کی مالک کمپنی میٹا نے پلیٹ فارم پر اسپیم اور چوری شدہ مواد کی بھرمار کو کم کرنے کے لیے ایک بڑے کریک ڈاؤن کا اعلان کیا ہے۔ کمپنی کا کہنا ہے کہ ایسے اکاؤنٹس جو مسلسل دوسرے کریئیٹرز کی ویڈیوز، تصاویر یا تحریری پوسٹس کو چوری کرکے دوبارہ پوسٹ کرتے ہیں، ان کے خلاف سخت کارروائی کی جائے گی۔

میٹا کی جانب سے جاری کردہ بلاگ پوسٹ میں بتایا گیا ہے کہ ایسے صارفین جو دوسروں کا مواد اپنی فیڈز میں شائع کر کے اصل تخلیق کار بننے کا تاثر دیتے ہیں، ان کی پوسٹس کی رسائی محدود کر دی جائے گی اور انہیں ایک مخصوص مدت کے لیے مونیٹائزیشن پروگرام سے بھی باہر کر دیا جائے گا۔

کمپنی کا کہنا ہے کہ ایک جیسا مواد بار بار فیڈ میں نظر آنا صارفین کے لیے بوریت کا باعث بنتا ہے اور یہ عمل نئے اور اصل کریئیٹرز کے لیے بھی نقصان دہ ثابت ہوتا ہے۔ اس مقصد کے تحت فیس بک کا سسٹم ایسی ویڈیوز اور میمز کی نشاندہی کرے گا جو کسی اور کی ملکیت ہوں، اور ان کی اشاعت کو محدود کر کے اصل تخلیق کار کی محنت کو محفوظ بنائے گا۔

میٹا نے اس بات پر بھی زور دیا ہے کہ وہ ان تخلیق کاروں کو ان کا جائز کریڈٹ دینے کے لیے مزید اقدامات پر کام کر رہا ہے۔ کمپنی کے مطابق، سال 2025 کے پہلے چھ مہینوں میں وہ پہلے ہی اسپیم یا جعلی انگیجمنٹ میں ملوث پانچ لاکھ سے زائد اکاؤنٹس کے خلاف کارروائی کر چکی ہے۔

ماہرین فلکیات نے ایک دوسرے نظام شمسی میں ایک ایسا نیا سیارہ دریافت کیا ہے جو ہماری زمین سے تقریباً 35 گنا بڑا ہے۔ اس سیارے کو Kepler‑139f کا نام دیا گیا ہے۔ اس کا قطر ہمارے نظام شمسی کے سب سے بڑے سیارے مشتری کے حجم کا تقریباً 59.5 فیصد ہے، جب کہ اس کا ماس زمین کے مقابلے میں 36 گنا زیادہ ہے۔ یہ سیارہ اپنے مرکزی ستارے کے گرد تقریباً 355 دن میں ایک چکر مکمل کرتا ہے، اور اس کا ستارے سے فاصلہ 1.006 AU یعنی زمین سے سورج کے فاصلے کے برابر ہے۔ یہ دریافت جدید مشاہداتی طریقوں جیسے ٹرانزٹ ٹائمنگ ویری ایشنز (TTV) اور ریڈیئل ویلیو ڈیٹا کی مدد سے عمل میں آئی۔ یہ سیارہ اُس مقام پر موجود ہے جہاں پہلے ہی تین ٹرانزٹنگ سیارے دریافت ہوچکے تھے، لیکن ایک بیرونی دیو ہیکل گیس سیارے کی کشش کے باعث یہ خود ٹرانزٹ کے دوران مشاہدے میں نہیں آ سکا۔ ماہرین نے اس دریافت کے ذریعے یہ نتیجہ اخذ کیا ہے کہ بڑے بیرونی سیارے اندرونی سیاروں کی مداری حرکت اور ٹرانزٹ کی اہلیت پر اثر ڈال سکتے ہیں، جس سے ان کے مشاہدے میں مشکلات پیدا ہوتی ہیں۔ اگرچہ Kepler‑139f ایک نیپچون جیسے گیس سیارہ ہونے کے باعث رہائش کے لیے موزوں نہیں سمجھا جاتا، مگر اس تحقیق سے ستاروں کے گرد سیاروں کے نظام کی ساخت اور ارتقائی عمل کو بہتر طور پر سمجھنے میں مدد ملے گی۔