مناسک حج 1446ھ کا آغاز، لاکھوں عازمین منیٰ روانہ، وقوف عرفہ کل ہوگا

لبیک اللھم لبیک کی روح پرور صداؤں کے ساتھ مناسک حج 1446 ہجری کا باقاعدہ آغاز آج 8 ذوالحجہ کو ہو گیا ہے۔ دنیا بھر سمیت پاکستان سے آئے ہوئے لاکھوں عازمینِ حج جمعرات کی صبح تک منیٰ میں قیام کریں گے اور عبادات، دعا اور استغفار میں مشغول رہیں گے۔ عازمین آج احرام باندھ کر دو رکعت نفل نماز ادا کرنے کے بعد منیٰ روانہ ہوں گے، جہاں وہ ظہر، عصر، مغرب اور عشاء کی نمازیں ادا کریں گے۔

کل 9 ذوالحجہ کو حج کا رکن اعظم وقوف عرفہ ادا کیا جائے گا۔ عازمین میدان عرفات روانہ ہوں گے جہاں مسجد نمرہ میں امام کعبہ شیخ صالح بن عبداللہ بن حمید حج کا خطبہ دیں گے اور نماز ظہر و عصر کی امامت کریں گے۔ حجاج کرام سورج غروب ہونے تک وقوف عرفہ کریں گے، جس کے بعد وہ مزدلفہ روانہ ہوں گے جہاں وہ مغرب اور عشاء کی نمازیں ملا کر پڑھیں گے اور شیطان کو مارنے کے لیے کنکریاں جمع کریں گے۔

دس ذوالحجہ کو وقوف مزدلفہ کے بعد حجاج بڑے شیطان کو سات کنکریاں ماریں گے، قربانی کریں گے اور حلق یا قصر کے بعد احرام کھول دیں گے۔ گیارہ اور بارہ ذوالحجہ کو حجاج کرام تینوں شیطانوں کو سات سات کنکریاں ماریں گے، جب کہ طواف زیارت اور صفا مروہ کی سعی بھی ادا کریں گے۔ 13 ذوالحجہ کو رمی جمرات کے بعد حجاج منیٰ سے واپسی اختیار کریں گے۔

اس سال تقریباً 20 لاکھ سے زائد عازمینِ حج کی شرکت متوقع ہے، جن میں مقامی اور بین الاقوامی زائرین شامل ہیں۔ سعودی حکومت کی جانب سے منیٰ، مزدلفہ اور عرفات میں فیلڈ اسپتال، ڈسپنسریاں، اور عارضی کلینکس قائم کیے گئے ہیں تاکہ حجاج کی صحت و سلامتی کو یقینی بنایا جا سکے۔ پاکستانی عازمین کے لیے پاکستان حج مشن کی جانب سے مخصوص مکاتب میں طبی سہولیات فراہم کی جا رہی ہیں۔

امن و امان کو برقرار رکھنے کے لیے 40 ہزار فوجی اہلکار اور 30 ہزار پولیس اہلکار تعینات کیے گئے ہیں جبکہ مکہ مکرمہ اور مشاعر مقدسہ کی فضائی نگرانی کے لیے رائل سعودی سیکیورٹی فورسز کے ہیلی کاپٹرز بھی گشت کر رہے ہیں۔ اس سال سعودی حکومت نے بغیر اجازت حج کرنے والوں کے خلاف سخت اقدامات کیے ہیں اور اب تک 2 لاکھ 70 ہزار سے زائد افراد کو مکہ میں داخل ہونے سے روکا گیا ہے۔