پاکستان-آئی ایم ایف بجٹ مذاکرات حتمی مرحلے میں، نجکاری پر زور

اسلام آباد: بجٹ 2025-26 کی تیاری کے سلسلے میں پاکستان اور آئی ایم ایف کے درمیان مذاکرات حتمی مرحلے میں داخل ہو گئے ہیں۔ ذرائع کے مطابق آئی ایم ایف نے سرکاری اداروں کی نجکاری تیز کرنے پر زور دیا ہے۔ حکومت کی جانب سے ادارے کو بریفنگ دی گئی کہ رائٹ سائزنگ کا عمل دسمبر 2025 تک مکمل کر لیا جائے گا۔

دستاویزات کے مطابق پی آئی اے کی نجکاری رواں سال مکمل ہونے کی توقع ہے اور اس راہ میں حائل رکاوٹیں دور کر دی گئی ہیں، جن میں ٹیکس واجبات، منفی ایکویٹی، اور یورپی یونین کی فلائٹس پر پابندی شامل تھیں۔

مزید برآں، اسلام آباد، فیصل آباد، اور گجرانوالہ الیکٹرک کمپنیز کی نجکاری کے لیے مالیاتی مشیر تعینات کر دیے گئے ہیں، جبکہ ان کمپنیوں کی نجکاری دسمبر 2025 تک مکمل کرنے کا ہدف مقرر کیا گیا ہے۔ دوسرے مرحلے میں حیدرآباد، سکھر، اور پشاور کی بجلی کمپنیوں کی نجکاری کی جائے گی۔

نجکاری کمیشن کے مطابق نندی پور پاور پلانٹ کی نجکاری جنوری 2026 میں شیڈول ہے، جبکہ نیویارک میں واقع روزویلٹ ہوٹل کی فروخت کے لیے ٹرانزیکشن اسٹرکچر پر کام جاری ہے۔ علاوہ ازیں، فرسٹ ویمن بینک اور ایچ بی ایف سی کی نجکاری میں بھی پیش رفت ہوئی ہے۔

آئی ایم ایف کو بتایا گیا کہ حکومت کی ترجیح منافع بخش سرکاری کمرشل اداروں کی نجکاری ہے تاکہ ان میں نجی سرمایہ کاری کو فروغ دیا جا سکے اور حکومتی مداخلت کم ہو۔