ایل او سی پر 40 سے 50 بھارتی فوجی ہلاک، پاکستان کا مؤثر جواب

اسلام آباد: وفاقی وزیر اطلاعات عطاء اللہ تارڑ نے قومی اسمبلی سے خطاب کرتے ہوئے کہا کہ لائن آف کنٹرول (ایل او سی) پر بھارتی جارحیت کے جواب میں پاکستان نے بھرپور کارروائی کی جس کے نتیجے میں 40 سے 50 بھارتی فوجی ہلاک ہوئے۔

انہوں نے کہا کہ بھارت نے رات کی تاریکی میں بزدلانہ حملہ کرتے ہوئے شہری آبادی کو نشانہ بنایا، لیکن پاکستان نے صرف فوجی اہداف کو نشانہ بناتے ہوئے اعلیٰ پیشہ وارانہ صلاحیت کا مظاہرہ کیا۔ ان کا کہنا تھا کہ قومی سلامتی کمیٹی نے افواج پاکستان کو مؤثر جواب دینے کا مکمل اختیار دے دیا ہے۔

عطاء اللہ تارڑ نے انکشاف کیا کہ بھارت کی جانب سے استعمال کیے گئے جدید ترین رافیل طیارے اور ڈرونز کا غرور پاکستانی افواج نے خاک میں ملا دیا۔ انہوں نے بتایا کہ اب تک 50 بھارتی ڈرونز مار گرائے جا چکے ہیں، جن میں سے بعض کو جَیم کیا گیا اور بعض کو ایئر ڈیفنس سسٹمز سے نشانہ بنایا گیا۔ گرائے گئے ڈرونز کا ملبہ بطور یادگار محفوظ رکھا جائے گا۔

وفاقی وزیر نے کہا کہ رافیل طیارے بنانے والی کمپنی کے شیئرز میں 18 فیصد کمی آئی ہے، جو بھارت کے لیے باعثِ شرمندگی ہے۔ انہوں نے کہا کہ بھارت نہ صرف عسکری میدان میں بلکہ سفارتی سطح پر بھی شکست کھا چکا ہے۔

آخر میں انہوں نے قوم سے اپیل کی کہ وہ متحد رہے، کیونکہ پاکستانی قوم ہمیشہ مشکل وقت میں یکجا ہو کر دشمن کے عزائم کو ناکام بناتی ہے۔