محکمہ داخلہ پنجاب نے محفوظ پنجاب ایکٹ 2025 کا ابتدائی مسودہ تیار کر لیا ہے، جس کا مقصد صوبے میں امن و امان کو یقینی بنانا ہے۔ اس مسودے کے تحت امن و امان کے لیے خطرہ بننے والے افراد کے خلاف سخت اقدامات کیے جا سکیں گے، جن میں ان کے پاسپورٹ اور شناختی کارڈز کو بلاک کرنا بھی شامل ہے۔

ترجمان محکمہ داخلہ کے مطابق اس ایکٹ میں ضلعی سطح پر قائم ڈسٹرکٹ انٹیلی جنس کمیٹیوں کو مزید اختیارات تفویض کیے گئے ہیں۔ مسودے کے تحت اگر کوئی فرد امن عامہ کے لیے خطرہ ہو تو اسے 90 دن کے لیے حفاظتی تحویل میں لیا جا سکے گا۔ ایسے افراد کی غیر منقولہ جائیداد کو ضبط کیا جا سکے گا جبکہ ان کے بینک اکاؤنٹس منجمد کرنے کی سفارش وفاقی حکومت کو بھیجی جائے گی۔

اس کے علاوہ سنگین جرائم میں ملوث افراد کے نام نو فلائی لسٹ میں شامل کرنے کی بھی سفارش کی جائے گی۔ مسودے میں کالعدم تنظیموں کے ارکان کے نام فورتھ شیڈول میں شامل کرنے کا اختیار بھی تجویز کیا گیا ہے۔

انٹیلی جنس کمیٹیوں کے احکامات کی خلاف ورزی پر سخت سزائیں تجویز کی گئی ہیں جن میں 3 سے 5 سال قید اور 5 سے 10 لاکھ روپے تک جرمانہ شامل ہے۔ کسی بھی شخص کو تین ماہ سے زیادہ عرصے کے لیے حفاظتی تحویل میں رکھنے کی اجازت صرف صوبائی ریویو بورڈ دے گا، جسے چیف جسٹس لاہور ہائیکورٹ کی جانب سے قائم کیا جائے گا۔ اس بورڈ کے سربراہ اور دو ارکان ہائیکورٹ کے موجودہ یا سابقہ ججز پر مشتمل ہوں گے۔

آرمی چیف جنرل سید عاصم منیر نے کہا ہے کہ پاکستان خطے میں امن کا خواہاں ہے لیکن اگر پاکستان کی خودمختاری یا جغرافیائی سالمیت کو چیلنج کیا گیا تو اس کا بھرپور اور مؤثر جواب دیا جائے گا۔

آئی ایس پی آر کے مطابق آرمی چیف نے جنرل ہیڈکوارٹرز (جی ایچ کیو) راولپنڈی میں نیشنل سکیورٹی ورکشاپ کے شرکاء سے خطاب کرتے ہوئے کہا کہ بلوچستان میں غیر ملکی سرپرستی میں ہونے والی دہشتگردی صوبے کی سلامتی اور ترقی کے لیے سب سے بڑا خطرہ ہے، تاہم دشمن عناصر کے ان مذموم عزائم کو ہرگز کامیاب نہیں ہونے دیا جائے گا۔

جنرل عاصم منیر نے کہا کہ پاکستان کی مسلح افواج عوام کی حمایت کے ساتھ دہشتگردی کے خلاف اپنی جنگ جاری رکھیں گی۔ انہوں نے واضح کیا کہ حکومت بلوچستان کی سماجی و اقتصادی ترقی پر مسلسل توجہ دے رہی ہے تاکہ عوام کو بہتر مواقع اور سہولیات فراہم کی جا سکیں۔

آرمی چیف کا کہنا تھا کہ پاکستان دشمن قوتوں کے ناپاک عزائم کو ناکام بنایا جائے گا اور اس بات پر زور دیا کہ دہشتگردی کا نہ کوئی مذہب ہوتا ہے، نہ کوئی فرقہ اور نہ ہی کوئی نسل۔ اس لعنت سے نجات حاصل کرنے کے لیے قوم کو متحد ہو کر اس کا مقابلہ کرنا ہوگا۔

انہوں نے اس عزم کا اعادہ کیا کہ پاکستان کی مسلح افواج اور قانون نافذ کرنے والے ادارے، عوام کی مکمل حمایت کے ساتھ، ملک سے دہشتگردی کے مکمل خاتمے تک اپنی جدوجہد جاری رکھیں گے۔