نیویارک ٹائمز کی نظر میں مردِ آہن: جنرل عاصم منیر کا بھارت کو دو ٹوک پیغام

امریکی اخبار نیویارک ٹائمز نے پاکستان کے سپہ سالار جنرل سید عاصم منیر کو مردِ آہن قرار دیتے ہوئے ان کی قائدانہ صلاحیتوں، جرات مندانہ بیانات اور عملی اقدامات کو سراہا ہے۔ رپورٹ میں کہا گیا کہ جنرل عاصم منیر نے بھارتی جارحیت کے پس منظر میں جس انداز سے فرنٹ لائن پر لیڈرشپ کا مظاہرہ کیا، وہ ایک مثالی مثال ہے۔

بھارتی مہم جوئی پر دوٹوک پیغام:

نیویارک ٹائمز کے مطابق حالیہ جنگی مشقوں کے دوران جنرل عاصم منیر نے ٹینک پر چڑھ کر جوانوں سے خطاب کرتے ہوئے بھارت کو واضح پیغام دیا کہ:

“بھارت کی کسی بھی مہم جوئی کا فوری، بھرپور اور منہ توڑ جواب دیا جائے گا۔”

ان کا یہ بیان نہ صرف پاکستانی افواج کے عزم و حوصلے کی عکاسی کرتا ہے بلکہ دشمن کو بروقت و واضح پیغام بھی ہے کہ پاکستان اپنی خودمختاری پر کوئی سمجھوتہ نہیں کرے گا۔

قومی اتحاد کا مرکز:

اخبار کے مطابق جنرل عاصم منیر نے نہ صرف فوج کو متحد رکھا بلکہ سیاسی و معاشی مشکلات میں گھرے عوام کو بھی یکجہتی کا پیغام دیا۔ ان کی شخصیت قومی اتحاد کی علامت بنتی جا رہی ہے۔

ٹلہ فائرنگ رینج کا دورہ:

چند روز قبل جنرل عاصم منیر نے ٹلہ فائرنگ رینج کا دورہ کیا جہاں انہوں نے منگلا سٹرائیک کور کی مشقوں “ہیمر اسٹرائیک” کا مشاہدہ کیا۔ اس موقع پر انہوں نے فوجی جوانوں کے بلند حوصلے، جنگی مہارت اور جذبۂ جہاد کو سراہتے ہوئے کہا:

“ہمارے افسر اور جوان پاک فوج کی آپریشنل برتری کی عملی تصویر ہیں۔”

بھارت کو سخت وارننگ:

جنرل عاصم منیر نے اپنے خطاب میں بھارت کو متنبہ کیا کہ:

“کوئی کسی غلط فہمی میں نہ رہے، بھارت کی کسی بھی جارحیت کا فوری، شدید اور فیصلہ کن ردعمل دیا جائے گا۔ پاکستان کی مسلح افواج ہر قیمت پر ملک کی خودمختاری اور علاقائی سالمیت کا دفاع کریں گی۔”

انہوں نے اس بات پر زور دیا کہ پاکستان علاقائی امن کا خواہاں ہے، لیکن قومی مفادات کے تحفظ کے لیے ہماری تیاری مکمل اور عزم غیرمتزلزل ہے۔

نیویارک ٹائمز کی یہ رپورٹ عالمی سطح پر پاکستان کے عسکری مؤقف اور قیادت کے واضح پیغام کی عکاسی کرتی ہے، جو بلاشبہ موجودہ صورتحال میں ایک مضبوط اور پُراعتماد موقف کی نمائندگی ہے۔