اسلام آباد ہائی کورٹ میں سابق خاتون اول بشریٰ بی بی کو جیل میں بہتر سہولیات کی فراہمی سے متعلق کیس کی سماعت ہوئی، جس میں اڈیالہ جیل کے سپرنٹنڈنٹ کی تیار کردہ رپورٹ عدالت میں جمع کروا دی گئی۔ یہ رپورٹ ایڈووکیٹ جنرل آفس کے ذریعے پیش کی گئی۔

جسٹس راجہ انعام امین منہاس نے کیس کی سماعت کی۔ عدالت نے ہدایت دی کہ رپورٹ وکیلِ درخواست گزار کو فراہم کی جائے، تاکہ وہ آئندہ سماعت پر اپنا مؤقف پیش کر سکیں۔ عدالت نے واضح کیا کہ کیس کی آئندہ سماعت روسٹر کے مطابق ہوگی۔

رپورٹ کے مطابق بشریٰ بی بی کو جیل میں ایک علیحدہ اور کشادہ کمرے میں رکھا گیا ہے، جس میں چہل قدمی کی گنجائش موجود ہے۔ کمرے میں روشنی، پنکھا، گرمیوں کے لیے روم کولر، ایل سی ڈی، اور ایک علیحدہ کچن کی سہولت فراہم کی گئی ہے جہاں وہ کھانا خود تیار کر سکتی ہیں۔ ان کا کھانا پہلے میڈیکل آفیسر چیک کرتا ہے۔

مزید یہ کہ دن میں دو مرتبہ ان کا طبی معائنہ کیا جاتا ہے اور ایک خاتون میڈیکل ایگزامنر ان کی دیکھ بھال پر مامور ہے۔ کمرے میں میز، کرسی، گدا، اور کتابوں کی الماری بھی موجود ہے تاکہ وہ آرام دہ ماحول میں وقت گزار سکیں۔ اہل خانہ اور وکلاء سے ملاقات میں بھی کوئی رکاوٹ نہیں دی جا رہی، تمام ملاقاتیں باقاعدگی سے کرائی جا رہی ہیں۔

دوسری جانب انسداد دہشتگردی عدالت کے جج امجد علی شاہ نے نومبر احتجاج کے 29 مقدمات میں بشریٰ بی بی کی عبوری ضمانت میں 20 مئی تک توسیع کر دی۔ سماعت کے دوران تمام تفتیشی افسران عدالت میں موجود تھے جبکہ پراسیکیوٹر سید ظہیر شاہ نے استغاثہ کا ریکارڈ پیش کیا۔ بشریٰ بی بی کے وکیل فیصل ملک نے ان مقدمات میں شامل تفتیش کرنے کی استدعا کی، جسے عدالت نے منظور کرتے ہوئے ہدایت دی کہ انہیں ان کے شوہر اور قانونی ٹیم کی موجودگی میں شاملِ تفتیش کیا جائے۔

وزیراعظم شہباز شریف کی زیر صدارت مشترکہ مفادات کونسل (سی سی آئی) کے اجلاس میں دریائے سندھ سے نہریں نکالنے کے منصوبے کو ختم کرنے کی منظوری دے دی گئی۔ اجلاس میں فیصلہ کیا گیا کہ نہروں کی تعمیر کے مسئلے پر ایک ٹیکنیکل کمیٹی تشکیل دی جائے گی جو آگے کے لائحہ عمل کی تیاری کرے گی۔

اجلاس میں چاروں صوبوں کے وزرائے اعلیٰ، وفاقی وزراء اسحاق ڈار، خواجہ آصف، امیر مقام اور دیگر 25 خصوصی شرکاء نے شرکت کی۔ ڈیڑھ گھنٹے تک جاری رہنے والے اجلاس میں 6 نکاتی ایجنڈے پر غور کیا گیا۔

کونسل نے کینالز سے متعلق 7 فروری کو ہونے والے ایکنک فیصلے کو مسترد کرتے ہوئے معاملہ دوبارہ انڈس ریور سسٹم اتھارٹی (ارسا) کو بھیجنے کا فیصلہ کیا۔ اعلامیہ کے مطابق، سی سی آئی نے متفقہ طور پر فیصلہ کیا کہ باہمی افہام و تفہیم کے بغیر کوئی نئی نہریں تعمیر نہیں کی جائیں گی، اور جب تک تمام صوبے متفق نہ ہوں، وفاقی حکومت اس حوالے سے کوئی اقدام نہیں کرے گی۔

اجلاس میں زور دیا گیا کہ تمام صوبوں کو شامل کرتے ہوئے زرعی پالیسی اور پانی کے انتظام کے بنیادی ڈھانچے کے لیے ایک طویل المدتی اور متفقہ روڈ میپ تیار کیا جائے۔ سی سی آئی نے اس بات کو دہرایا کہ تمام صوبوں کے پانی کے حقوق 1991 کے معاہدے اور 2018 کی واٹر پالیسی کے تحت مکمل طور پر محفوظ ہیں۔

اجلاس کے دوران پہلگام حملے کے بعد بھارت کی جانب سے کیے گئے یکطرفہ، غیر قانونی اور غیر ذمہ دارانہ اقدامات کی شدید مذمت کی گئی۔ اعلامیہ میں پوری قوم کو اتحاد اور یکجہتی کا پیغام دیا گیا اور کہا گیا کہ پاکستان ایک پرامن اور ذمہ دار ریاست ہے، لیکن اپنے دفاع کی مکمل صلاحیت رکھتا ہے۔