اہلِ غزہ سے اظہارِ یکجہتی کے لیے آج پاکستان بھر میں شٹر ڈاؤن ہڑتال کی گئی، جس کے نتیجے میں کاروباری سرگرمیاں مکمل طور پر معطل رہیں۔
فلسطینی عوام پر ہونے والے اسرائیلی مظالم کے خلاف پاکستان کے طول و عرض میں ایک بھرپور پیغام دیا گیا۔ کراچی سے لے کر پشاور تک تجارتی مراکز بند، سڑکوں پر ٹریفک معمول سے انتہائی کم اور کاروبار زندگی معطل نظر آیا۔

جماعت اسلامی اور مختلف تاجر تنظیموں کی اپیل پر ملک بھر میں بازار، مارکیٹیں اور شاپنگ مالز بند رہے۔ کراچی میں مرکزی اور ذیلی تمام مارکیٹیں مکمل طور پر بند تھیں، جبکہ متعدد مقامات پر فلسطینی عوام سے یکجہتی کے لیے احتجاجی مظاہرے بھی کیے گئے، جن میں مظاہرین نے اسرائیل مخالف اور فلسطینی عوام کی حمایت میں نعرے لگائے۔

ٹریفک پولیس نے ریلیوں اور احتجاجی اجتماعات کے باعث شہریوں کے لیے متبادل راستوں کا انتظام کیا۔
پشاور میں قصہ خوانی بازار، چوک یادگار اور اشرف روڈ سمیت تاریخی بازار مکمل بند رہے، جبکہ تمام بڑی مارکیٹیں اور مالز بھی فلسطینی عوام سے اظہار یکجہتی کے طور پر بند رہے۔

مری کے پہاڑی علاقوں میں بھی مکمل شٹر ڈاؤن ہڑتال دیکھنے میں آئی۔ مال روڈ، کینٹ مارکیٹ اور دیگر علاقوں میں مکمل سناٹا چھایا رہا۔ راولپنڈی کے راجا بازار، مری روڈ اور صدر کے علاقے بھی ہڑتال کے باعث سنسان رہے۔

اس جدوجہد میں طبی شعبہ بھی شامل رہا۔ ڈرگسٹ اینڈ کیمسٹ ایسوسی ایشن کی جانب سے ہڑتال میں شمولیت اختیار کی گئی، جس کے نتیجے میں کئی میڈیکل اسٹورز احتجاجاً بند رہے۔

بلوچستان کے شہروں کوئٹہ، مستونگ، خضدار، قلات اور پشین میں بھی مکمل شٹر ڈاؤن ہڑتال کی گئی، جبکہ پنجاب کے چھوٹے اور بڑے شہروں میں بھی فلسطینیوں سے یکجہتی کے لیے عوام نے کاروبار بند رکھ کر دنیا کو اپنی وابستگی کا پیغام دیا۔

جماعت اسلامی کے امیر، حافظ نعیم الرحمان نے کہا کہ پاکستانی عوام اسرائیلی ظلم اور امریکی حمایت کو کبھی قبول نہیں کریں گے۔ انہوں نے کہا کہ یہ ہڑتال فلسطینیوں سے محبت اور مظلوموں کے لیے آواز بلند کرنے کی ایک کوشش ہے۔

پاکستان سے فریضۂ حج کی سعادت حاصل کرنے والے عازمین کے لیے نئی ہدایات جاری کر دی گئی ہیں، جن کے مطابق مخصوص کارڈ کا حصول لازمی قرار دیا گیا ہے۔ تفصیلات کے مطابق وزارت مذہبی امور نے تمام عازمین حج کو سعودی عرب روانگی سے قبل گردن توڑ بخار، فلو اور پولیو سے بچاؤ کی ویکسین لازمی لگوانے کی ہدایت کی ہے۔

تمام عازمین کو اپنے قریبی حاجی کیمپ سے یہ ویکسین مفت میں لگوا کر پیلا کارڈ حاصل کرنا ہوگا۔ وزارت نے واضح کیا ہے کہ پیلے کارڈ کے بغیر سعودی عرب میں داخلہ ممکن نہیں ہوگا۔

وزارت مذہبی امور نے مزید کہا ہے کہ 65 سال سے زائد عمر کے عازمین کو اپنا پرانا کورونا ویکسین کارڈ بھی ساتھ رکھنا ضروری ہے۔ اگر کسی کے پاس یہ کارڈ موجود نہیں، تو حاجی کیمپ سے دوبارہ کورونا ویکسین لگوا کر نیا کارڈ حاصل کرنا ہوگا۔

عازمین کو سختی سے خبردار کیا گیا ہے کہ وہ صرف مستند حج اجازت نامے کے ساتھ ہی سعودی عرب کا سفر کریں۔ وزارت نے نشاندہی کی ہے کہ بعض جعلی کمپنیاں اور غیر قانونی اشتہارات لوگوں کو دھوکہ دے کر جعلی حج اجازت نامے فراہم کر رہی ہیں۔

وزارت کے مطابق غیر قانونی اجازت ناموں کے نتیجے میں سعودی حکام کی جانب سے حراست، جرمانے یا ملک بدری کا سامنا کرنا پڑ سکتا ہے، جبکہ منیٰ، عرفات اور مزدلفہ میں داخلے سے بھی انکار ہو سکتا ہے۔ اس کے علاوہ، ایسے اجازت ناموں پر کی گئی ادائیگیوں کی واپسی بھی ممکن نہیں ہوگی۔

وزارت مذہبی امور نے زور دیا ہے کہ ایک محفوظ، جائز اور روحانی طور پر بھرپور حج کے لیے عازمین حج صرف مستند ذرائع سے رجوع کریں اور تمام ضروری ہدایات پر مکمل عملدرآمد یقینی بنائیں۔