خیبرپختونخواہ حکومت نے 10 لاکھ غریب خاندانوں کے لیے رمضان اور عید فنڈز کی منظوری دے دی ہے۔ وزیراعلیٰ علی امین گنڈاپور نے کہا کہ رمضان پیکج کی تقسیم 15 رمضان سے پہلے کی جائے گی۔ میڈیا کی رپورٹ کے مطابق، وزیراعلیٰ علی امین گنڈاپور کی زیر صدارت کے پی کابینہ کا اجلاس ہوا، جس میں دس لاکھ غریب خاندانوں کے لیے رمضان اور عید فنڈز کی منظوری دی گئی۔

وزیراعلیٰ خیبرپختونخواہ نے مزید کہا کہ غرباء، یتیموں اور ٹرانسجینڈرز کو شفاف طریقے سے پیکج فراہم کیا جائے۔ دہشتگردی سے متاثرہ غریب خاندانوں کو بھی اس پیکج میں شامل کیا جائے گا۔ غریبوں اور معذور افراد کا خاص خیال رکھا جائے گا، اور صوبے کے تمام ٹرانسجینڈرز کو بھی پیکج دیا جائے گا۔

پیکج کی تقسیم 15 رمضان سے پہلے کی جائے گی۔ رمضان سے قبل سرکاری ملازمین کو تنخواہیں اور پنشن 25 فروری کو ادا کر دی جائیں گی۔

اجلاس کے دوران بریفنگ میں بتایا گیا کہ گزشتہ 6 ماہ کے دوران حکومت کا سرپلس بجٹ 169 ارب روپے ہے۔ موجودہ حکومت نے ایک سال میں اپنی آمدن میں ریکارڈ 49 فیصد اضافہ کیا ہے اور سابق دور حکومت کے بقایاجات میں 18.5 ارب روپے ادا کیے ہیں۔ بریفنگ کے مطابق خیبر پختونخوا میں اس وقت ہیموفیلیا کے 850 مریض رجسٹرڈ ہیں، اور اجلاس میں ان مریضوں کے علاج کے لیے 1212.9 ملین روپے کی منظوری دی گئی۔ قرض اتارنے کے لیے ڈیپٹ منیجمنٹ فنڈ قائم کیا گیا ہے۔

حکومت معیشت میں بہتری کے دعوے کر رہی ہے، لیکن صنعتی شعبے کو چلانے میں ناکام نظر آ رہی ہے۔ رواں مالی سال کی پہلی ششماہی کے دوران ملک کی بڑی صنعتوں کی پیداوار میں مزید کمی واقع ہوئی ہے۔ وفاقی ادارہ شماریات کی جانب سے جاری کردہ رپورٹ میں بتایا گیا ہے کہ بڑی صنعتوں کی پیداوار میں مزید کمی آئی ہے۔

ادارہ شماریات کی ششماہی رپورٹ کے مطابق، دسمبر میں سالانہ بنیادوں پر بڑی صنعتوں کی پیداوار میں 3.73 فیصد کی کمی ریکارڈ کی گئی، جبکہ نومبر کی نسبت دسمبر میں پیداوار میں 19.07 فیصد کا اضافہ ہوا۔

رپورٹ کے مطابق، جولائی سے دسمبر کے دوران فرنیچر کی صنعتی پیداوار میں 61.06 فیصد، مشینری اور ایکوئپمنٹ کی پیداوار میں 27.88 فیصد، اور الیکڑیکل ایکوئپمنٹ کی پیداوار میں 19.10 فیصد کی کمی دیکھی گئی۔

آئرن اینڈ سٹیل مصنوعات کی پیداوار میں 12.04 فیصد، جبکہ کیمیکلز کی پیداوار میں 8.87 فیصد کی کمی ریکارڈ کی گئی۔ تاہم، جولائی سے دسمبر کے دوران آٹوموبیل سیکٹر کی پیداوار میں 50.16 فیصد کا اضافہ ہوا، تمباکو کی صنعتی پیداوار میں 19.21 فیصد، اور پیپر اور بورڈ کی پیداوار میں 2.81 فیصد کا اضافہ ہوا۔ اسی دوران فارماسیوٹیکل سیکٹر میں بھی کچھ بہتری دیکھی گئی۔