اسلام آباد میں منعقدہ “لیڈرز ان اسلام آباد بزنس سمٹ” سے خطاب کرتے ہوئے وفاقی وزیر برائے آئی ٹی و ٹیلی کام شزہ فاطمہ نے آئی ٹی کے مختلف شعبوں میں بڑے منصوبوں کا اعلان کیا۔

انہوں نے کہا کہ دنیا تیزی سے مصنوعی ذہانت اور کوانٹم کمپیوٹنگ کی طرف بڑھ رہی ہے، اور اگر پاکستان نے خود کو ہم آہنگ نہ کیا تو پیچھے رہ جائے گا۔ انہوں نے زور دیا کہ ٹیکنالوجی اب زراعت، تعلیم، صحت، کامرس اور پیداوار سمیت ہر شعبے میں بنیادی کردار ادا کر رہی ہے۔

شزہ فاطمہ نے کہا کہ پاکستان کی آئی ٹی مارکیٹنگ پر ہر ایک ڈالر 49 ڈالر کماتا ہے، اور حکومت کا ہدف 25 ارب ڈالر کی آئی ٹی ایکسپورٹ حاصل کرنا ہے۔ انہوں نے اعلان کیا کہ 28 اور 29 اپریل کو اسلام آباد میں ڈیجیٹل غیر ملکی سرمایہ کاری سمٹ کا انعقاد کیا جائے گا جس میں سعودی عرب تعاون کرے گا۔

وفاقی وزیر نے بتایا کہ اسلام آباد کے لیے ایک “سپر ایپ” تیار کی جا رہی ہے جبکہ “اسمارٹ اسلام آباد” کا پائلٹ پروجیکٹ بھی شروع کیا جا رہا ہے، جس کے تحت بزنس کی آن لائن رجسٹریشن اور اجازت آسان بنائی جائے گی، جیسا کہ چین کے شہر شیزن میں ہوتا ہے۔

شزہ فاطمہ نے نوجوانوں کو ملک کا قیمتی اثاثہ قرار دیتے ہوئے کہا کہ حکومت تخلیقی صلاحیتوں کے حامل نوجوانوں کی مکمل معاونت کر رہی ہے۔

وفاقی وزیر داخلہ محسن نقوی نے کہا ہے کہ پاکستان برطانیہ کے ساتھ باہمی مفاد کے تمام شعبوں میں تعاون کو مزید فروغ دینا چاہتا ہے۔ ان خیالات کا اظہار انہوں نے اسلام آباد میں برطانیہ کے وزیر برائے فیتھ اینڈ کمیونیٹیز لارڈ واجد خان سے ملاقات کے دوران کیا۔ ملاقات میں انسداد دہشتگردی، سیکیورٹی، اور سرحد پار جرائم کی روک تھام جیسے موضوعات پر بات چیت ہوئی۔

ملاقات میں وزیر مملکت داخلہ طلال چوہدری، برطانوی ہائی کمشنر جین میریٹ اور سیکرٹری داخلہ خرم آغا بھی شریک تھے۔

لارڈ واجد خان نے جعفر ایکسپریس حملے کی مذمت کرتے ہوئے شہداء کے اہلخانہ سے تعزیت کا اظہار کیا اور دہشتگردی کے خلاف پاکستان کی قربانیوں کو سراہا۔ انہوں نے افغان مہاجرین کی برطانیہ منتقلی میں سہولت فراہم کرنے پر وزارت داخلہ کا شکریہ ادا کیا۔

محسن نقوی نے بتایا کہ غیر قانونی غیر ملکیوں کی واپسی کا عمل باعزت طریقے سے جاری ہے، جبکہ قانونی دستاویزات کے حامل افراد کے خلاف کوئی کارروائی نہیں کی جا رہی۔

انہوں نے مزید کہا کہ پاکستان دنیا کا وہ واحد ملک ہے جس نے دہشتگردی کے خلاف جنگ میں ہر طبقے کی جانب سے عظیم قربانیاں دی ہیں، اور اس جنگ میں عالمی برادری بالخصوص برطانیہ کا کردار انتہائی اہم ہے۔ طلال چوہدری نے کہا کہ حکومت غیر قانونی غیر ملکیوں کو وطن واپسی میں ہر ممکن سہولیات فراہم کر رہی ہے۔