پاکستانی شوبز انڈسٹری کی خوبرو اور باصلاحیت اداکارہ کومل عزیز خان نے حال ہی میں ایک مارننگ شو میں شرکت کے دوران اپنی ذاتی زندگی کے ایک حساس پہلو پر بات کی، جس نے مداحوں کو حیران کر دیا۔

انٹرویو کے دوران میزبان نے جب ان سے پوچھا کہ انہیں کس چیز سے سب سے زیادہ خوف محسوس ہوتا ہے تو کومل عزیز نے بلا جھجک اعتراف کیا کہ شادی ان کے لیے خوف کی علامت بن چکی ہے۔ اداکارہ نے کہا کہ وہ خود کو ایک بہادر عورت سمجھتی ہیں، جو دھرنوں میں کھڑی ہو سکتی ہیں، کاروبار چلا سکتی ہیں اور تنازعات کا سامنا کر سکتی ہیں، مگر شادی کا تصور انہیں خوفزدہ کر دیتا ہے۔

کومل عزیز نے بتایا کہ بچپن سے اب تک انہوں نے اپنے اردگرد جتنی بھی شادیاں دیکھی ہیں، وہ زیادہ متاثر کن نہیں تھیں، جس کی وجہ سے ان کے دل میں شادی کے حوالے سے ہچکچاہٹ اور خوف بیٹھ گیا۔ ان کا کہنا تھا کہ ان کی اولین ترجیح ہمیشہ خودمختاری رہی ہے: خود کمائی، خود فیصلے لینا، اپنی زندگی اپنے طریقے سے گزارنا۔

اداکارہ نے مزید کہا کہ انہوں نے اپنے دفتر کی کئی خواتین کو شادی کے بعد ملازمت چھوڑتے دیکھا ہے، جس نے ان کے اندر یہ خوف مزید پختہ کر دیا کہ کہیں شادی ان کی آزادی اور خودمختاری کو متاثر نہ کر دے۔ تاہم، انہوں نے خوشی کا اظہار کرتے ہوئے کہا کہ ان کے اپنے خاندان میں ایسا ماحول نہیں ہے کہ شادی کے بعد عورت کو محدود کر دیا جائے، جس کی وجہ سے وقت کے ساتھ ساتھ ان کا یہ خوف کچھ حد تک کم ہو رہا ہے۔

کچھ عرصہ قبل ایک اور انٹرویو میں کومل عزیز نے یہ بھی واضح کیا تھا کہ وہ کسی ایسے شخص سے شادی کریں گی جو نہ صرف ان سے زیادہ کماتا ہو بلکہ زندگی میں کامیاب بھی ہو، کیونکہ ان کے نزدیک برابری، سمجھ داری اور باہمی عزت ایک کامیاب رشتے کی بنیاد ہیں۔ کومل کا کہنا تھا کہ انہوں نے اپنے ہونے والے شریکِ حیات کے لیے جو معیار مقرر کیے ہیں، شاید وہی ان کی شادی میں تاخیر کی ایک بڑی وجہ ہیں۔

کومل عزیز کی یہ صاف گوئی اور اپنی آزادی کے لیے ان کا عزم مداحوں میں خاصی پذیرائی حاصل کر رہا ہے۔

آرمی چیف جنرل سید عاصم منیر نے کہا ہے کہ دو قومی نظریہ ہمیشہ سے پاکستان کے وجود کی بنیاد رہا ہے اور ہمیں اپنے ملک کا دفاع کرنا خوب آتا ہے۔ انہوں نے واضح کیا کہ دو قومی نظریے پر کسی پاکستانی کو رتی برابر بھی شک نہیں۔

پاکستان ملٹری اکیڈمی کاکول میں کیڈٹس کی پاسنگ آؤٹ تقریب سے خطاب کرتے ہوئے آرمی چیف نے کہا کہ بھارتی گودی میڈیا حقائق کو اپنے جھوٹ اور پروپیگنڈے سے چھپانے کی کوشش کر رہا ہے، لیکن وہ تاریخ کو مسخ نہیں کر سکتا۔

جنرل عاصم منیر نے کہا کہ دو قومی نظریے کی بنیاد یہ ہے کہ مسلمان اور ہندو دو علیحدہ قومیں ہیں، جن کے ضابطہ ہائے حیات، سماجی ڈھانچے اور اقدار مکمل طور پر مختلف ہیں۔ بانی پاکستان قائداعظم محمد علی جناح نے بھی بارہا اپنے تاریخی خطابات میں اس فرق کو واضح کیا تھا۔ انہوں نے کہا کہ مسلمانوں اور ہندوؤں کی مذہب، تہذیب، ثقافت، تاریخ اور طرزِ زندگی میں اتنا بنیادی فرق ہے کہ یہ خلیج کبھی ختم نہیں ہو سکتی۔

آرمی چیف نے کہا کہ ہمارے آباو اجداد نے پاکستان کے حصول کے لیے بے مثال قربانیاں دیں اور ہم نے اپنے وطن کے لیے بہت جدوجہد کی ہے۔ انہوں نے کہا کہ بھارتی میڈیا اور سوشل میڈیا اپنے جھوٹے پروپیگنڈے سے دو قومی نظریے کو جھٹلا نہیں سکتے، اور ہر جھوٹے پروپیگنڈے کی کوشش ناکام ہو گی۔

انہوں نے مزید کہا کہ دو قومی نظریہ ایک زندہ حقیقت ہے، جسے کوئی جھٹلایا نہیں جا سکتا۔ ہم اپنے وطن کا دفاع کرنا جانتے ہیں اور کسی بھی جارحیت کا منہ توڑ جواب دینے کی بھرپور صلاحیت رکھتے ہیں۔

دریں اثنا، پاکستان ملٹری اکیڈمی کاکول میں پاسنگ آؤٹ پریڈ کی پروقار تقریب منعقد ہوئی جس میں وزیر اعظم شہباز شریف مہمانِ خصوصی تھے، جبکہ آرمی چیف جنرل سید عاصم منیر مہمانِ اعزاز کے طور پر شریک ہوئے۔

تقریب میں وزیر دفاع خواجہ آصف، وزیر اطلاعات عطا اللہ تارڑ، غیر ملکی سفارتکار، اور اعلیٰ سول و عسکری حکام نے بھی شرکت کی۔ آرمی چیف جنرل عاصم منیر کو تقریب میں آمد پر سلامی دی گئی، اور وزیر اعظم شہباز شریف کی آمد پر بگل بجا کر اعلان کیا گیا اور انہیں بھی سلامی پیش کی گئی۔

وزیر اعظم شہباز شریف نے پاسنگ آؤٹ کی پریڈ کا معائنہ کیا اور گریجویٹ ہونے والے کیڈٹس کی حلف برداری میں شرکت کی۔ بہترین کارکردگی کا مظاہرہ کرنے والے کیڈٹس میں وزیراعظم نے انعامات تقسیم کیے۔

اعزازی شمشیر انڈر آفیسر محمد حنان ملک نے حاصل کی، صدارتی طلائی تمغہ انڈر آفیسر زین العابدین نے حاصل کیا جبکہ چیئرمین جوائنٹ چیفس آف اسٹاف کمیٹی اوورسیز گولڈ میڈل نیپال کے کیڈٹ کو دیا گیا۔ لیڈی کیڈٹ لائبہ رحمان کو بھی اعزاز سے نوازا گیا، اور انڈر آفیسر محمد طلحہ ایاز نے کمانڈنٹ اعزازی چھڑی حاصل کی۔

وزیراعظم شہباز شریف نے پاس آؤٹ ہونے والے کیڈٹس کو مبارکباد دیتے ہوئے کہا کہ پاسنگ آؤٹ پریڈ میں شرکت ان کے لیے باعث اعزاز ہے۔ انہوں نے کہا کہ ہماری مسلح افواج تنظیم، اتحاد اور قومی مفاد کی تکمیل اور عزم کی علامت ہیں۔