وفاقی وزیر داخلہ محسن نقوی نے کہا ہے کہ پاکستان برطانیہ کے ساتھ باہمی مفاد کے تمام شعبوں میں تعاون کو مزید فروغ دینا چاہتا ہے۔ ان خیالات کا اظہار انہوں نے اسلام آباد میں برطانیہ کے وزیر برائے فیتھ اینڈ کمیونیٹیز لارڈ واجد خان سے ملاقات کے دوران کیا۔ ملاقات میں انسداد دہشتگردی، سیکیورٹی، اور سرحد پار جرائم کی روک تھام جیسے موضوعات پر بات چیت ہوئی۔

ملاقات میں وزیر مملکت داخلہ طلال چوہدری، برطانوی ہائی کمشنر جین میریٹ اور سیکرٹری داخلہ خرم آغا بھی شریک تھے۔

لارڈ واجد خان نے جعفر ایکسپریس حملے کی مذمت کرتے ہوئے شہداء کے اہلخانہ سے تعزیت کا اظہار کیا اور دہشتگردی کے خلاف پاکستان کی قربانیوں کو سراہا۔ انہوں نے افغان مہاجرین کی برطانیہ منتقلی میں سہولت فراہم کرنے پر وزارت داخلہ کا شکریہ ادا کیا۔

محسن نقوی نے بتایا کہ غیر قانونی غیر ملکیوں کی واپسی کا عمل باعزت طریقے سے جاری ہے، جبکہ قانونی دستاویزات کے حامل افراد کے خلاف کوئی کارروائی نہیں کی جا رہی۔

انہوں نے مزید کہا کہ پاکستان دنیا کا وہ واحد ملک ہے جس نے دہشتگردی کے خلاف جنگ میں ہر طبقے کی جانب سے عظیم قربانیاں دی ہیں، اور اس جنگ میں عالمی برادری بالخصوص برطانیہ کا کردار انتہائی اہم ہے۔ طلال چوہدری نے کہا کہ حکومت غیر قانونی غیر ملکیوں کو وطن واپسی میں ہر ممکن سہولیات فراہم کر رہی ہے۔

اسلام آباد ہائی کورٹ نے عمران خان اور ان کی اہلیہ بشریٰ بی بی کی جانب سے 190 ملین پاؤنڈز کیس میں سزا معطلی اور رہائی کی درخواستوں پر جلد سماعت کی استدعا منظور کر لی ہے۔ تاہم عدالت نے مرکزی کیس کی سماعت کی کوئی تاریخ مقرر نہیں کی۔

قائم مقام چیف جسٹس سرفراز ڈوگر اور جسٹس انعام امین منہاس پر مشتمل بنچ نے کیس کی سماعت کی۔ عدالت نے کہا کہ چونکہ ڈویژن بینچ کی جانب سے جوڈیشل آرڈر جاری ہو چکا ہے، اس لیے ہم براہِ راست کوئی تاریخ نہیں دے سکتے، مگر سزا کے خلاف اپیلوں کے ساتھ ساتھ سزا معطلی کی درخواستیں بھی دیکھی جائیں گی۔

سماعت کے دوران عمران خان کی جانب سے وکیل ظہیر عباس اور عثمان گل، جبکہ بشریٰ بی بی کی طرف سے وکیل علی بخاری عدالت میں پیش ہوئے۔ وکیل علی بخاری نے سزا معطلی کی درخواستیں مقرر کرنے کی تاریخ دینے کی استدعا کی جس پر عدالت نے مذکورہ وضاحت دی۔