ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ بھارت جھوٹے اور من گھڑت بیانیے کی بنیاد پر خطرناک کھیل کھیل رہا ہے، جبکہ دنیا اب بھارت کی حقیقت کو جان چکی ہے۔ بی بی سی کو انٹرویو دیتے ہوئے ان کا کہنا تھا کہ پاکستان نے انتہائی بالغ نظری سے بھارتی الزامات کا جواب دیا ہے، لیکن اصل تنازع ابھی بھی موجود ہے اور کسی بھی وقت صورتحال بگڑ سکتی ہے۔

لیفٹیننٹ جنرل احمد شریف چوہدری نے کہا کہ 10 مئی کے بعد کئی دن گزر چکے ہیں، لیکن بھارت میں اب بھی جھوٹ پر مبنی بیانیہ چلایا جا رہا ہے۔ انہوں نے زور دیا کہ پاکستان امن کا خواہاں ہے، لیکن اگر جنگ مسلط کی گئی تو ہم اس کے لیے مکمل طور پر تیار ہیں۔ دونوں ممالک ایٹمی قوتیں ہیں اور کسی بھی فوجی تصادم کا نتیجہ انتہائی خطرناک ہوگا۔ ایٹمی جنگ نہ صرف ناقابل تصور بلکہ باہمی تباہی کا باعث ہوگی۔

انہوں نے کہا کہ اگر کسی شدت پسند واقعے میں پاکستانیوں کے ملوث ہونے کے ثبوت ہیں تو بھارت انہیں فراہم کرے، ہم خود کارروائی کریں گے۔ پاکستان میں اس وقت امن کی فضا قائم ہے اور قوم اس کا جشن منا رہی ہے۔

ڈی جی آئی ایس پی آر کا کہنا تھا کہ ہر چند سال بعد بھارت ایک نیا جھوٹا بیانیہ گھڑتا ہے، اور یہ اس کی پرانی عادت بن چکی ہے۔ انہوں نے بھارتی حمایت یافتہ دہشتگرد گروہ “فتنہ الخوارج” پر شدید تنقید کرتے ہوئے کہا کہ یہ گروہ نہ صرف شریعت بلکہ انسانی حقوق کی کھلی خلاف ورزی کر رہا ہے۔ یہ لوگ مساجد کو پناہ گاہ بنا کر ان کا تقدس پامال کرتے ہیں اور سیکیورٹی فورسز پر فائرنگ کرتے ہیں تاکہ جوابی کارروائی سے بچ سکیں۔

ان کا مزید کہنا تھا کہ فتنہ الخوارج مذہب کے لبادے میں چھپ کر دہشتگردی کر رہا ہے، جو کہ ناقابل برداشت ہے۔ بھارت اس صورتحال کو اپنی داخلی سیاست میں فائدے کے لیے استعمال کر رہا ہے۔ انہوں نے سوال اٹھایا کہ کیا بھارت میں اس وقت کوئی ذمہ دار سیاسی قیادت موجود ہے؟

اسلام آباد: آرمی چیف جنرل سید عاصم منیر کو فیلڈ مارشل کے رینک لگانے کے لیے ایوان صدر میں آج شام 4 بجے منعقد ہونے والی تقریب ملتوی کر دی گئی ہے۔ میڈیا رپورٹس کے مطابق ملتوی ہونے کی ممکنہ وجوہات میں جنرل عاصم منیر کی ذاتی مصروفیات کے ساتھ ساتھ خضدار میں اسکول بس پر ہونے والے خودکش حملے میں بچوں کی شہادت کو بھی قرار دیا جا رہا ہے۔ تقریب کی نئی تاریخ کا اعلان بعد میں کیا جائے گا۔

دوسری جانب، جنرل ہیڈکوارٹر (جی ایچ کیو) میں فیلڈ مارشل عاصم منیر کے اعزاز میں ایک پروقار تقریب کا انعقاد کیا گیا جہاں انہیں گارڈ آف آنر پیش کیا گیا۔
آئی ایس پی آر کے مطابق فیلڈ مارشل نے یادگارِ شہداء پر حاضری دی، پھول چڑھائے اور فاتحہ خوانی کی۔ انہوں نے شہداء کو خراجِ عقیدت پیش کیا اور اپنے اعزاز کو قوم، مسلح افواج، شہداء اور غازیوں کے نام کیا۔

تقریب میں اعلیٰ فوجی حکام، افسران، اور شرکاء نے فیلڈ مارشل سید عاصم منیر کو ان کی خدمات اور قیادت پر زبردست خراج تحسین پیش کیا۔
تقریب سے خطاب میں فیلڈ مارشل نے کہا کہ یہ دن ان محافظوں کے عزم، قربانی اور ایثار کی یاد دلاتا ہے جنہوں نے مادرِ وطن کے لیے اپنی جانوں کا نذرانہ پیش کیا۔