صوبہ بلوچستان کے علاقے قلعہ عبداللہ میں دہشت گردوں نے بارود سے بھری ایک گاڑی فورسز کی چیک پوسٹ سے ٹکرا دی، جس کے نتیجے میں 2 جوان شہید ہوئے، جبکہ جوابی کارروائی میں 2 خودکش بمباروں سمیت 5 دہشت گرد مارے گئے۔ مسلح افواج کے شعبہ تعلقات عامہ (آئی ایس پی آر) کے مطابق 27 اور 28 جنوری کی درمیانی رات، دہشت گردوں نے بلوچستان کے ضلع قلعہ عبداللہ کے علاقے گلستان میں سکیورٹی فورسز کی چوکی پر حملے کی کوشش کی، لیکن سکیورٹی فورسز نے بہادری کے ساتھ اس حملے کو ناکام بنا دیا۔
آئی ایس پی آر کے مطابق، حملے کے بعد دہشت گردوں نے بارودی مواد سے بھری گاڑی چوکی کی بیرونی دیوار سے ٹکرا دی، جس کے بعد ہونے والے فائرنگ کے تبادلے میں تمام 5 حملہ آور ہلاک ہوگئے، جن میں دو خودکش حملہ آور بھی شامل تھے، تاہم اس کارروائی کے دوران 2 جوان بھی شہید ہوئے۔

مسلح افواج کے شعبہ تعلقات عامہ نے بتایا کہ اس شدید مقابلے میں پاکستان کے دو بہادر سپوت نائیک طاہر خان، جن کی عمر 39 سال تھی اور جو ضلع ٹانک کے رہائشی تھے، اور لانس نائیک طاہر اقبال، جن کی عمر 26 سال تھی اور وہ ضلع کرک کے رہائشی تھے، دونوں نے بہادری سے لڑتے ہوئے جام شہادت نوش کیا۔

آئی ایس پی آر نے کہا ہے کہ حملے کے بعد علاقے میں کلیئرنس آپریشن جاری ہے، تاکہ اس گھناؤنے عمل کے مجرموں کو پکڑا جا سکے۔

مصنوعی ذہانت کی دنیا میں چینی کمپنی کی ایپ ڈیپ سیک نے تہلکہ مچا دیا ہے۔ یہ ایپ لانچ ہوتے ہی امریکا اور یورپ میں مقبول ہو گئی، جہاں اسے ایک ہفتے میں سب سے زیادہ ڈاؤن لوڈ کیا گیا۔ اس کی غیر متوقع مقبولیت نے امریکا اور یورپ کی ٹیک کمپنیوں کو پریشانی میں ڈال دیا ہے۔

امریکا میں ڈیپ سیک کی اچانک مقبولیت کے بعد اسٹاک ایکسچینج میں ٹیکنالوجی کمپنیوں کے شیئرز میں نمایاں کمی دیکھی گئی۔ امریکی صدر ٹرمپ نے بھی ڈیپ سیک ایپ کو خطرناک قرار دیتے ہوئے کہا کہ اتنی سستی چینی ایپ کی لانچنگ کے بعد امریکی انڈسٹری کو ہوشیار ہو جانا چاہیے۔

امریکی کمپنی اوپن اے آئی کے مالک نے کہا کہ چینی ایپ متاثر کن ہے، لیکن وہ اس سے مقابلہ کرنے کے لیے تیار ہیں۔ ڈیپ سیک اے آئی چیٹ بوٹ ہے، جو صرف چھ ملین ڈالر کی لاگت سے تیار ہوئی ہے۔ چینی کمپنی کا دعویٰ ہے کہ یہ ایپ حساب، کوڈنگ، اور دیگر معاملات میں اوپن اے آئی کے جدید ترین ماڈل سے مقابلہ کر سکتی ہے۔

کمپنی نے یہ بھی بتایا کہ وہ عارضی طور پر ایپ کی رجسٹریشن محدود کر رہے ہیں، کیونکہ ان کی ایپ پر سائبر حملوں کا خطرہ ہے۔ سنگاپور میں ٹیکنالوجی کے ماہرین کا کہنا ہے کہ یہ ایپ مصنوعی ذہانت کی پوری صنعت کی سرمایہ کاری کو متاثر کر سکتی ہے۔

چینی وزیراعظم نے ڈیپ سیک ایپ کی شاندار کامیابی پر کمپنی کے مالک کو سراہا ہے۔ یہ ایپ نہ صرف چین بلکہ پوری دنیا میں مصنوعی ذہانت کے شعبے میں ایک اہم پیشرفت کے طور پر دیکھی جا رہی ہے