آکسفورڈ یونیورسٹی کی ایک حالیہ اور جامع تحقیق نے سائنسی دنیا کو حیران کر دیا ہے، جس میں انکشاف ہوا ہے کہ انسانی دماغ مخصوص حالات میں ہزاروں سال تک قدرتی طور پر محفوظ رہ سکتا ہے۔ محققہ الیگزینڈرا مورٹن-ہیورڈ کی سربراہی میں کی گئی اس تحقیق میں دنیا بھر سے 4,400 سے زائد محفوظ شدہ انسانی دماغوں کا ریکارڈ اکٹھا کیا گیا۔ حیرت انگیز طور پر ان میں سے 1,300 کیسز ایسے تھے جن میں صرف دماغ محفوظ رہا، جبکہ باقی تمام نرم بافتیں گل سڑ چکی تھیں۔ سائنس دانوں کا کہنا ہے کہ اس غیرمعمولی تحفظ کے پیچھے کئی سائنسی عوامل کارفرما ہو سکتے ہیں۔ ان میں “مالیکیولر کراس لنکنگ” شامل ہے، جس میں پروٹینز اور چکنائی آپس میں جُڑ کر دماغی بافتوں کو سخت اور پائیدار بنا دیتے ہیں۔ اس کے علاوہ “میٹل کمپلیکسیشن” یعنی آئرن یا کاپر جیسے دھاتوں کی موجودگی سے کیمیائی تعاملات بھی دماغ کے تحفظ میں کردار ادا کرتے ہیں۔ مزید برآں، ماحولیاتی عوامل جیسے کہ آکسیجن کی کمی، نمی، یا انتہائی سرد درجہ حرارت بھی بیکٹیریا کی سرگرمی کو محدود کر کے دماغی بافتوں کو محفوظ رکھنے میں مدد دیتے ہیں۔ یہ تحقیق نہ صرف انسانی جسم کے بعد از مرگ تحفظ کے حوالے سے نئی راہیں کھولتی ہے بلکہ آثار قدیمہ اور نیورو سائنس میں بھی اہم پیش رفت کا ذریعہ بن سکتی ہے۔

پاکستان تحریک انصاف (پی ٹی آئی) کے رکن قومی اسمبلی جنید اکبر نے پبلک اکاؤنٹس کمیٹی (پی اے سی) کی چیئرمین شپ سے استعفیٰ دے دیا ہے۔ جنید اکبر نے اپنا تحریری استعفیٰ پارٹی چیئرمین بیرسٹر گوہر علی خان کو پیش کیا۔ اگرچہ پارٹی کی جانب سے باضابطہ طور پر استعفے کی وجوہات بیان نہیں کی گئیں، تاہم ذرائع کا کہنا ہے کہ یہ فیصلہ پارٹی کی اندرونی حکمت عملی اور تنظیمی فیصلوں کے تحت کیا گیا ہے۔ ذرائع کے مطابق بانی پی ٹی آئی عمران خان نے جنید اکبر کو چیئرمین شپ سے مستعفی ہونے کی ہدایت دی تھی تاکہ وہ پارٹی کے تنظیمی امور پر مکمل توجہ دے سکیں۔ عمران خان کا پیغام ان کی بہن علیمہ خان کے ذریعے پارٹی قیادت تک پہنچایا گیا تھا۔ پارٹی ذرائع کے مطابق جنید اکبر کی جگہ اپوزیشن لیڈر عمر ایوب کو پی اے سی کا چیئرمین بنائے جانے کا امکان ہے۔ یاد رہے کہ جنید اکبر نے چیئرمین پی اے سی کی حیثیت سے کئی اہم حکومتی منصوبوں کی آڈٹ رپورٹس پر کارروائی کی اور کرپشن کے کئی کیسز اجاگر کیے۔ جنید اکبر رواں سال 24 جنوری کو متفقہ طور پر پی اے سی کے چیئرمین منتخب ہوئے تھے، ان کی نامزدگی مسلم لیگ (ن) کے ارکان نے بھی حمایت کے ساتھ منظور کی تھی۔