قطر میں موجود امریکی فوجی اڈے العدید ایئربیس پر ایران کی جانب سے کیے گئے میزائل حملے کے بعد امریکی صدر ڈونلڈ ٹرمپ کا بیان سامنے آیا ہے جس میں انہوں نے کہا ہے کہ دنیا کو مبارک ہو، اب امن کا وقت آ چکا ہے۔ صدر ٹرمپ نے اس موقع پر امیر قطر کی خطے میں امن قائم کرنے کی کوششوں کو سراہا اور کہا کہ ایران نے 14 میزائل داغے جن میں سے 13 کو امریکی دفاعی نظام نے فضا میں ہی تباہ کر دیا، جبکہ ایک میزائل جو ہدف تک پہنچا وہ بھی کوئی نقصان پہنچانے کی صلاحیت نہیں رکھتا تھا اس لیے اسے نظر انداز کر دیا گیا۔ ٹرمپ کا بیان مزید دعویٰ کیا کہ ایران نے اس حملے سے قبل پیشگی اطلاع دی تھی جس کی وجہ سے کسی قسم کا جانی نقصان نہیں ہوا۔

امریکی صدر کے مطابق ایران کا سرکاری ردعمل کمزور تھا، اور اب وقت آ گیا ہے کہ ایران خطے میں امن و استحکام کے لیے عملی اقدامات کرے۔ انہوں نے اسرائیل سے بھی یہی توقع ظاہر کی کہ وہ کشیدگی کو بڑھانے کے بجائے امن کی طرف قدم بڑھائے۔ اس سے قبل بین الاقوامی خبر رساں ادارے رائیٹرز نے دعویٰ کیا تھا کہ ایران نے قطر اور امریکہ کو سفارتی ذرائع کے ذریعے میزائل حملے سے قبل آگاہ کر دیا تھا تاکہ انسانی نقصان سے بچا جا سکے۔

دوسری طرف قطر کے وزیر دفاع نے تصدیق کی ہے کہ ملک کا دفاعی نظام فعال رہا اور میزائل حملوں کو روک دیا گیا۔ ان کا کہنا تھا کہ ایرانی اقدامات سے خطے کے امن کو خطرہ لاحق ہے اور قطر اپنی فضائی حدود اور عوام کی سلامتی کو یقینی بنانے کے لیے تمام ضروری اقدامات کر رہا ہے۔ اس حملے میں کسی قسم کی ہلاکت یا زخمی ہونے کی اطلاع موصول نہیں ہوئی۔ ایرانی پاسداران انقلاب کے ترجمان نے قطر میں امریکی اڈے پر حملے کی تصدیق کرتے ہوئے کہا کہ ان حملوں کا مقصد قطر کو نقصان پہنچانا نہیں بلکہ جنگ بھڑکانے والی حکومت کو اس کی پالیسیوں کا جواب دینا تھا۔ ترجمان کے مطابق امریکی اڈے دراصل ان کی طاقت نہیں بلکہ ان کی کمزوری کی علامت ہیں۔