چترال برفانی تودہ: 9 افراد جاں بحق

چترال برفانی تودہ اور پہاڑی علاقوں میں شدید برفباری

چترال: ملک کے بالائی پہاڑی علاقوں میں چترال برفانی تودہ کے باعث 9 افراد ہلاک اور کئی افراد زخمی ہو گئے۔ میڈیا رپورٹس کے مطابق لوئر چترال میں ایک ہی خاندان کے 10 افراد برف کے نیچے دب گئے تھے۔ امدادی کارروائی کے دوران ایک بچہ زندہ نکالا گیا، جبکہ دیگر 9 افراد کی لاشیں ملبے سے نکال لی گئی ہیں۔

آزاد کشمیر اور شمالی علاقوں میں برفباری

آزاد کشمیر کے بالائی علاقوں وادی نیلم، سدھنوتی، باغ، ہٹیاں بالا اور اپر نیلم میں گزشتہ رات سے شدید برفباری جاری ہے۔ مظفرآباد میں کئی برس بعد برفباری ریکارڈ کی گئی۔ وادی نیلم میں تین مکانات گر گئے۔ لینڈ سلائیڈنگ اور برفباری کے باعث اہم شاہراہیں بند اور بجلی کا نظام متاثر ہوا۔

ضلع حویلی میں ایمبولینس سمیت تقریباً 25 گاڑیاں برف میں پھنس گئیں۔ پاک فوج نے بروقت ریسکیو آپریشن کرتے ہوئے 32 مسافروں کو محفوظ مقام پر منتقل کیا اور ایمبولینس میں موجود دو میتیں نکالیں۔

خیبرپختونخوا اور گلگت بلتستان میں صورتحال

خیبرپختونخواہ میں وادی کاغان، دیربالا، لواری ٹنل، باجوڑ اور شانگلہ ٹاپ میں برفباری سے رابطہ سڑکیں بند رہیں۔ شانگلہ ٹاپ میں 22 گھنٹے سے پھنسے 4 سیاحوں کو ریسکیو کر لیا گیا۔

گلگت بلتستان میں چلاس اور اپر کوہستان میں لینڈ سلائیڈنگ کے باعث شاہراہِ قراقرم مختلف مقامات پر بند ہو گئی، جس سے سیکڑوں مسافر پھنس گئے۔ استور اور دیگر بالائی علاقوں میں 5 سے 6 فٹ تک برف پڑ چکی ہے۔

این ڈی ایم اے کی ہدایات

این ڈی ایم اے نے 23 سے 29 جنوری تک پہاڑی علاقوں میں الرٹ جاری کر دیا ہے۔ مغربی ہواؤں کے باعث اگلے 24 سے 48 گھنٹوں میں مزید برفباری متوقع ہے۔ عوام کو غیر ضروری سفر سے گریز اور احتیاطی تدابیر اختیار کرنے کی ہدایت کی گئی ہے۔

مزید خبریں: پاکستان کے پہاڑی علاقوں کی تازہ برفباری