وفاقی وزیر خزانہ سینیٹر محمد اورنگزیب نے بتایا ہے کہ اپوزیشن کے احتجاج کی وجہ سے ملک کو روزانہ 190 ارب روپے کا نقصان ہو رہا ہے۔ ایکسپریس نیوز کے مطابق، وزیر خزانہ نے اس بات کا انکشاف کیا کہ وزارت نے احتجاج کے اثرات پر ایک رپورٹ تیار کی ہے، جس میں بتایا گیا ہے کہ احتجاج کی وجہ سے جی ڈی پی کو روزانہ 144 ارب روپے کا نقصان ہو رہا ہے۔

انہوں نے مزید کہا کہ آئی ٹی اور ٹیلی کام کے شعبے میں ہونے والے نقصانات اس کے علاوہ ہیں۔ وزیر خزانہ نے یہ بھی کہا کہ برآمدات میں کمی کی وجہ سے روزانہ 26 ارب روپے کا نقصان ہو رہا ہے، اور غیر ملکی سرمایہ کاری میں کمی سے یومیہ تین ارب روپے کا نقصان ہوتا ہے۔

سینیٹر محمد اورنگزیب کے مطابق، وفاقی حکومت کو روزانہ 190 ارب روپے کا نقصان ہو رہا ہے، جبکہ صوبائی حکومتوں کے نقصانات اس سے بھی زیادہ ہیں

پاکستان تحریک انصاف (پی ٹی آئی) کے خلاف 24 نومبر کو پرتشدد مظاہروں کے بعد مقدمہ درج کر لیا گیا ہے۔ اس مقدمے میں سابق وزیراعظم عمران خان، ان کی اہلیہ بشریٰ بی بی، سابق صدر ڈاکٹر عارف علوی اور دیگر پی ٹی آئی رہنماؤں کو نامزد کیا گیا ہے۔ مقدمہ تھانہ ٹیکسلا میں انسداد دہشت گردی کی دفعات کے تحت درج کیا گیا ہے۔

مقدمے میں اپوزیشن لیڈر عمر ایوب، وزیراعلیٰ خیبر پختونخوا علی امین گنڈا پور، علیمہ خان، اعظم سواتی، تیمور مسعود، شہریار ریاض سمیت 300 سے زائد مقامی رہنماؤں اور کارکنان کو بھی شامل کیا گیا ہے۔

مقدمے کی تفصیلات کے مطابق مظاہرین نے سرکاری موٹر سائیکل اور گاڑیوں کو نقصان پہنچایا، جبکہ پولیس ڈرائیور کو اغوا کر کے تشدد کا نشانہ بھی بنایا گیا۔ یہ بھی کہا گیا کہ عمران خان نے اڈیالہ جیل سے پارٹی رہنماؤں کو اسلام آباد میں احتجاج کی قیادت کرنے کی ہدایت کی۔

مقدمے میں کار سرکار میں مداخلت، دفعہ 144 کی خلاف ورزی، سرکاری و پرائیویٹ املاک کو نقصان پہنچانے اور شاہراہوں کو بند کرنے جیسے الزامات عائد کیے گئے ہیں۔

واضح رہے کہ عمران خان کی کال پر 24 نومبر کو پی ٹی آئی کے قافلے خیبر پختونخوا سے اسلام آباد کی طرف روانہ ہوئے تھے، جہاں مظاہرین اور پولیس کے درمیان تصادم ہوا تھا۔ پی ٹی آئی کارکنان نے پولیس پر پتھراؤ کیا، جس پر پولیس نے شیلنگ کی