head lines
پنجاب میں امن وامان کنٹرول میں، مریم نواز
وزیراعلیٰ مریم نواز نے کہا ہے کہ پنجاب میں امن وامان مکمل کنٹرول میں ہے۔ انہوں نے واضح کیا کہ کسی کو انتشار پھیلانے کی اجازت نہیں دی جائے گی۔ ان کے مطابق حکومت امن، قانون اور استحکام کے لیے ہر ممکن اقدام کر رہی ہے۔
وزیراعلیٰ پنجاب سے اسپیکر پنجاب اسمبلی ملک احمد خان نے ملاقات کی۔ اس دوران صوبے کی سیاسی اور انتظامی صورتحال پر تفصیلی بات چیت ہوئی۔ دونوں رہنماؤں نے قانون سازی اور ایوان کی کارروائی کے مختلف پہلوؤں پر بھی گفتگو کی۔ اتفاق ہوا کہ پنجاب میں امن وامان خراب کرنے والوں سے سختی سے نمٹا جائے گا۔
سپیکر پنجاب اسمبلی نے کاروبار میں آسانی کے لیے ای بز سسٹم کی تعریف کی۔ انہوں نے کہا کہ عوام صوبے میں امن وامان کی بہتری پر حکومت کا شکریہ ادا کر رہے ہیں۔ ان کا کہنا تھا کہ سرمایہ کاری کے لیے صورتحال پہلے سے بہتر ہے۔
مریم نواز نے اسپیکر کو ایوان کے رویے اور تعاون پر سراہا۔ انہوں نے کہا کہ پنجاب کی تاریخ میں پہلی بار بڑے منصوبے چھوٹے شہروں سے شروع ہو رہے ہیں۔ ان کے مطابق پنجاب میں کاروبار کے لیے بہترین مواقع موجود ہیں اور سرمایہ کاروں کو استفادہ کرنا چاہیے۔ انہوں نے کہا کہ صوبہ ایک نیا ترقیاتی ماڈل اختیار کر رہا ہے جس کا مثبت اثر عوام تک پہنچے گا۔